Трамп заявіў, што выйграе вайну ў Іране

• 21.04.2026, 9:46

Кіраўнік Белага дома назваў ключавыя поспехі арміі ЗША.

Прэзідэнт ЗША Дональд Трамп заявіў, што амерыканцы «выйграюць вайну» супраць Ірана і дамагаюцца значных поспехаў у ваеннай кампаніі. Пра гэта ён напісаў у сацыяльнай сетцы Truth Social.

Па словах Трампа, амерыканскія ўзброеныя сілы нібыта ўжо знішчылі ключавыя элементы вайсковай інфраструктуры праціўніка.

«Я выйграю вайну з вялікай перавагай, усё ідзе вельмі добра, але калі вы чытаеце фэйкавыя навіны ў The New York Times, у абсалютна жудасным і агідным The Wall Street Journal або, на шчасце, у амаль збанкруцелай The Washington Post, вы б падумалі, што мы прайграем», — адзначыў ён.

Трамп сцвярджае, што Іран апынуўся ў складаным становішчы: яго флот нібыта знішчаны, авіяцыя вымушана карыстацца схаванымі аэрадромамі, а сістэмы супрацьракетнай абароны выведзены з ладу. Ён таксама заявіў, што эканамічная блакада наносіць краіне сур'ёзную шкоду.

Паводле яго слоў, Іран страчвае каля 500 мільёнаў долараў у дзень, што ён назваў «непрымальным паказчыкам нават у кароткатэрміновай перспектыве».

Трамп таксама абвінаваціў амерыканскія СМІ ў распаўсюджванні «фэйкавых навін» і заявіў, што яны «хварэюць за перамогу Ірана», дадаўшы, што гэта, на яго думку, не адбудзецца.