«Увесь час трымалі ў «Вайберы», не дазвалялі адключаць тэлефон»
- 21.04.2026, 16:05
Беларуску падманулі паводле схемы «Белпошты».
Пенсіянерку з Мастоў падманулі тэлефонныя ашуканцы — яны выкарысталі схему «Белпошта», паведамляе прэс-служба МУС.
Паводле звестак міліцыі, жанчыну напалохалі надуманай крымінальнай справай нібыта за адмыванне сродкаў, набытых злачынным шляхам, і прымусілі «задэклараваць» каля 110 тысяч рублёў у эквіваленце.
— Мне патэлефанавалі 2 красавіка, спачатку на мабільны, сказалі, што гэта «Белпошта», што я не аплаціла пасылку, што мне трэба паведаміць нумар. Яны мне выслалі ў «Вайбер», я паведаміла нумар таго, што там высветлілася. Потым літаральна праз паўгадзіны мне зноў патэлефанавалі і сказалі, што яны з Камітэта дзяржаўнага кантролю, што ў мяне забралі пакет дакументаў, пашпарт, усю інфармацыю пра мяне, — распавяла жанчына.
Ашуканцы спыталі ў яе, ці ёсць у яе рахункі ў банку, яна сказала, што няма.
— Яны спыталі: вы нядаўна закрывалі рахунак? Я сказала: так. Спыталі, ці ёсць наяўныя. Сказалі, што трэба задэклараваць, бо яны могуць быць махлярскія. На вашыя адкрытыя рахункі могуць пакласці грошы і сказаць, што яны ад прастытуцыі і наркотыкаў, што я, маўляў, здымаю працэнт. Спытала, дзе дэклараваць. Мне сказалі, што прыедзе кур'ер з разліковага цэнтра Нацыянальнага банка. Мне трэба аддаць яму грошы. Усё, я аддала, — падзялілася пацярпелая.
Паводле яе слоў, пасля гэтага на наступны дзень ёй зноў званілі і сказалі, што яе машыну выставілі на таргі, што яе «трэба абцяжарыць».
— Я разумею, што такое абцяжарванне. Тыпу заклад там ці крэдыт. Я яму тлумачу, а ён мне кажа, што яе трэба прадаць нібыта юрыдычнай асобе. І грошы таксама трэба задэклараваць. Я прадала машыну, — распавяла пацярпелая.
Жанчына дадала, што з 2 па 4 красавіка ёй увесь час званілі і не давалі спакою, «пастаянна былі ў «Вайберы»», не дазвалялі адключаць тэлефон, каб яна нікому нічога не паведамляла, ні з кім не размаўляла.
Яна зразумела, што яе падманулі, калі ў абяцаны ашуканцамі час (у сераду а 16:00) да яе не прыйшоў прадстаўнік абласнога дзяржаўнага кантролю і не вярнуў усё «задэклараванае».
У МУС заявілі, што сышчыкі затрымалі кур'ера, аднак грошы ён паспеў перадаць наступнаму звяну ў злачынным ланцугу.