Трамп упэўнены, што дасягне «выдатнага» пагаднення з Іранам

• 21.04.2026, 16:26

Паводле яго слоў, новае кіраўніцтва Ірана «значна больш рацыянальнае» за сваіх папярэднікаў.

Прэзідэнт ЗША Дональд Трамп выказаў упэўненасць, што Вашынгтон урэшце дасягне «выдатнага» мірнага пагаднення з Іранам, хоць і не чакае, што дамоўленасць аб спыненні агню, тэрмін дзеяння якой сканчаецца 22 красавіка, будзе працягнутая.

Пра гэта Трамп сказаў у інтэрв'ю CNBC.

У амерыканскага прэзідэнта спыталі, чаго ён чакае ад другога раўнда перамоў з Іранам, якія павінны адбыцца ў аўторак у Пакістане. Трамп выказаў упэўненасць, што Вашынгтон і Тэгеран дасягнуць мірнага пагаднення.

«Я лічу, што ў іх няма выбару. Мы знішчылі іх флот, мы знішчылі іх ваенна-паветраныя сілы, мы знішчылі іх лідараў», – сказаў Трамп.

На думку прэзідэнта ЗША, новае кіраўніцтва Ірана «значна больш рацыянальнае» за сваіх папярэднікаў.

«Шчыра кажучы, мы ліквідавалі іх лідараў, што ў пэўнай ступені ўскладняе сітуацыю, але цяперашнія лідары значна больш рацыянальныя. Гэта змена рэжыму, як бы вы гэта ні называлі, і я не казаў, што збіраюся гэта зрабіць, але я зрабіў гэта ўскосна», – заявіў ён.

На пытанне, ці падоўжыць ён тэрмін дзеяння рэжыму спынення агню, каб даць час для мірных перамоваў і дасягнення пагаднення аб завяршэнні вайны, амерыканскі прэзідэнт адказаў: «Ну, я не хачу гэтага рабіць».