Яшчэ два расійскія НПЗ спынілі працу

• 21.04.2026, 22:53

З-за ўдараў БПЛА.

Навакуйбышаўскі і Туапсінскі нафтаперапрацоўчыя заводы (абодва належаць «Раснафце») спынілі перапрацоўку нафты з-за ўдараў БПЛА, паведамляе Reuters са спасылкай на крыніцы ў галіне.

Паводле суразмоўцаў агенцтва, Туапсінскі НПЗ, адзіны на чарнаморскім узбярэжжы Расіі, стаіць з 16 красавіка, калі беспілотнікі атакавалі порт Туапсэ. Паўторная атака адбылася 20 красавіка. У выніку пацярпелі партавая інфраструктура і рэзервуары з нафтай, а дым ад пажару да аўторка расцягнуўся на 300 км і дасягнуў Стаўрапаля.

З-за немагчымасці адгружаць прадукцыю ў порт Туапсінскі НПЗ спыніў адзіную ўстаноўку перапрацоўкі нафты магутнасцю 12 млн тон у год, паведамілі крыніцы Reuters.

Навакуйбышаўскі НПЗ магутнасцю 8,3 млн тон у год спыніўся 18 красавіка. Завод, які летась вырабіў 1,1 млн тон бензіну, 1,6 млн тон дызелю і 1,3 млн тон мазуту, быў атакаваны ў суботу. У выніку былі спынены абедзве ўстаноўкі першаснай перапрацоўкі нафты — АВТ-11 і АВТ-9, паведамілі крыніцы Reuters.

Раней у гэтым месяцы пад налёт беспілотнікаў трапіў НПЗ «Ніжагароднафтааргансінтэз» (НОРСІ), які займае 4-е месца па аб'ёмах перапрацоўкі ў Расіі і забяспечвае палівам у тым ліку маскоўскі рэгіён. Ён спыніў прыём нафтавай сыравіны 5 красавіка і тады ж перастаў выстаўляць бензін і дызельнае паліва на таргі Санкт-Пецярбургскай таварна-сыравіннай біржы. Завод магутнасцю 17 млн тон у год, які летась выпусціў больш за 5 млн тон бензіну і столькі ж — дызелю, меркавана, не будзе працаваць да канца красавіка, казалі крыніцы Reuters.

21 сакавіка з-за атакі БПЛА спыняў прыём нафты Саратаўскі НПЗ «Раснафты», а 26 сакавіка спыніўся завод «Кірышынафтааргансінтэз» («Кінеф») у Ленінградскай вобласці, які займае 2-е месца ў Расіі па аб'ёмах перапрацоўкі і першае — у еўрапейскай частцы краіны.