Колькасць картак на аднаго кліента могуць абмежаваць у Беларусі

• 23.04.2026, 13:18

Што пра гэта вядома.

Пытанне аб абмежаванні колькасці картак на аднаго кліента прапрацоўваецца ў Беларусі, паведаміў першы намеснік старшыні праўлення Нацбанка Беларусі Аляксандр Ягораў на канферэнцыі «Лічбавы банкінг — 2026», перадае адно з расійскіх інфармацыйных агенцтваў.

Спікер адзначыў, што ў Расіі цяпер на разглядзе знаходзіцца закон, які прызваны змагацца з дропамі — падстаўнымі асобамі, якія атрымліваюць на свае карткі грошы ад махляроў, здымаюць іх або пералічваюць далей, за што атрымліваюць узнагароду.

Аляксандр Ягораў падкрэсліў, што «ужываць усе самыя жорсткія метады, якія выкарыстоўваюць калегі з Расіі, мы не плануем», але некаторыя меры ўсё ж будуць запазычаныя.

— У прыватнасці, цяпер прапрацоўваецца пытанне аб абмежаванні колькасці картак на аднаго кліента, але пры гэтым мы будзем падыходзіць разумна, каб 99,9% кліентаў не адчулі на сабе гэтыя абмежаванні, — паведаміў першы намеснік старшыні праўлення Нацбанка.