Расія зноў знайшла праблемы ў беларускай прадукцыі

• 23.04.2026, 16:40

Што не так?

У РФ зноў узніклі пытанні да якасці беларускай прадукцыі. Адразу некалькі беларускіх прадпрыемстваў трапілі пад узмоцнены кантроль Расельгаснагляду. А для аднаго з буйных вытворцаў малочнай прадукцыі ўвялі больш сур'ёзныя абмежаванні. На сітуацыю звярнуў увагу Myfin.

Найбольш жорсткія меры закранулі ААТ «Мілкавіта». Статус прадпрыемства ў рэестры Мытнага саюза зменены на «спецыяльныя патрабаванні».

Гэта азначае часовыя абмежаванні на пастаўкі. У дадзеным выпадку «Мілкавіта» пакуль не можа ўвозіць у Расію тварог. Пры гэтым не ўдакладняецца, якія менавіта прэтэнзіі паўсталі ў расійскіх правяральнікаў да прадукцыі.

Яшчэ сем беларускіх прадпрыемстваў перавялі на ўзмоцнены лабараторны кантроль. Гэта не забарона, але цяпер іх прадукцыю будуць правяраць часцей і больш старанна.

Прычына — упершыню выяўленыя парушэнні.

Так, у мясной прадукцыі ў некалькіх вытворцаў выявілі антыпірын — лекавы сродак (жарапаніжальны), які не павінен прысутнічаць у харчовых прадуктах. Яго знайшлі ў каўбасах ТАА «Велес-Міт» і ААТ «Магілёўскі мясакамбінат».

Ёсць прэтэнзіі і па мікрабіялогіі. У прадукцыі «Віцебскай бройлернай птушкафабрыкі» зафіксавалі перавышэнне дапушчальнага ўзроўню мікраарганізмаў. Падобныя парушэнні выявілі ў «Фішмэн Паўэр», але ўжо ў рыбных вырабах.

У малочнай прадукцыі «Нясвіжскага завода дзіцячага харчавання» і кампаніі «Праймілк» выявілі бактэрыі групы кішачнай палачкі — адпаведна ў тварозе і сухім малацэ.

Акрамя таго, у Салігорскага філіяла «Слуцкага сыраробнага камбіната» выявілі неадпаведнасці па малочнакіслых мікраарганізмах у смятане.