У Расіі загарэлася яшчэ адно буйное нафтасховішча

• 23.04.2026, 19:20

З-за атакі БПЛА.

Услед за нафтавым тэрміналам у Туапсэ, які палае чацвёртыя суткі, зацягваючы неба ядавітым смогам і правакаючы «нафтавыя дажджы», пажар узнік яшчэ на адным расійскім нафтасховішчы.

Як паведамляе Reuters са спасылкай на дзве галіновыя крыніцы, з-за атакі БПЛА 23 красавіка загарэлася нафтаперапампавальная станцыя (НПС) «Горкі» ў Ніжагародскай вобласці. На станцыі, што ўваходзіць у сістэму «Транснефці», гараць прынамсі два з чатырох рэзервуараў з нафтай аб’ёмам па 50 тысяч кубаметраў кожны, удакладнілі суразмоўцы Reuters.

НПС «Горкі», размешчаная ў 50 км ад Ніжняга Ноўгарада, удзельнічае ў перапампоўцы нафты на экспарт у напрамку порта Прыморск на Балтыйскім моры. Праз гэтую станцыю сыравіна таксама паступае на ключавыя НПЗ — Маскоўскі, НПЗ «Слаўнафта-Яраслаўнафтааргсінтэз» (ЯНОС) і НПЗ «Кірышынафтааргсінтэз» (Кінеф). Усе яны ўваходзяць у топ-10 найбуйнейшых у Расіі.

Пра атаку БПЛА на прамысловае прадпрыемства Ніжагародскай вобласці паведаміў у чацвер губернатар Глеб Нікіцін. Паводле яго слоў, у налёце ўдзельнічалі 11 дронаў. «У выніку падзення абломкаў пашкоджанні з наступным гарэннем атрымаў аб’ект на тэрыторыі аднаго з прадпрыемстваў», — пісаў губернатар у Telegram-канале.

Раней на гэтым тыдні з-за атакі БПЛА загарэліся рэзервуары ў порце Туапсэ. Дым ад пажару, які эколагі назвалі «найбуйнейшай» для рэгіёна «экалагічнай катастрофай», расцягнуўся на сотні кіламетраў і дасягнуў Стаўрапаля, Сочы і Анапы. У моры ўтварылася нафтавая пляма даўжынёй каля 7,5 км, якая ў чацвер дасягнула ўзбярэжжа Туапсэ.