Пуцін упершыню пракаментаваў абмежаванні інтэрнэту ў РФ

• 23.04.2026, 20:15

Заява прагучала на фоне зніжэння даверу да лідара Крамля.

Дыктатар РФ Уладзімір Пуцін заявіў, што перабоі ў працы інтэрнэту ў расійскіх гарадах могуць быць звязаныя з мерамі бяспекі і супрацьдзеяннем тэрарыстычным пагрозам.

Паводле яго слоў, такія збоі нібыта здараюцца нячаста, але магчымыя нават у «буйных мегаполісах» і звязаныя з працай сілавых структур.

«Калі вядзецца аператыўная праца па прадухіленні злачынных дзеянняў, у прыватнасці тэрактаў, загадзя шырокае інфармаванне грамадскасці можа нанесці шкоду аператыўнай распрацоўцы, бо злачынцы таксама ўсё чуюць і бачаць», – сказаў ён.

Таксама Пуцін заявіў, што ў вырашэнні праблемы з адсутнасцю сувязі ў расіян разлічвае на праваахоўныя органы, якія павінны дзейнічаць больш «прафесійна» і «вынаходліва».

Заява прагучала на фоне зніжэння даверу да лідара Крамля. Паводле ацэнак аналітыкаў Інстытута вывучэння вайны, падзенне звязана з абмежаваннямі доступу да сацсетак, у прыватнасці Telegram, якія выклікалі крытыку нават сярод пракрамлёўскіх прапагандыстаў і ваенкараў.