«Такога не было 20 гадоў»: у Туапсэ сапраўдны экалагічны калапс
- 24.04.2026, 11:13
Пажар на НПЗ, па якім ударылі дроны, працягваецца.
У расійскім Туапсэ пасля удараў беспілотнікаў узнік маштабны экалагічны крызіс. Мясцовыя жыхары скардзяцца на «нафтавы дождж», таксічны смог і чорныя плямы на вуліцах і ў лужынах.
Пра наступствы пажару на нафтавым тэрмінале і сітуацыю ў горадзе расказвае BBC. Там паведамілі, што ў сераду, 22 красавіка, жыхары горада заўважылі «нафтавы дождж».
У дварах з'явіліся чорныя лужыны з плёнкай, аўтамабілі пакрыліся кроплямі, а на жывёлах і скуры людзей засталіся сляды забруджвання. Эколагі патлумачылі, што падчас пажару нафтапрадукты не толькі гараць, але і выпараюцца: пары падымаюцца ў атмасферу, кандэнсуюцца і разам з ападкамі вяртаюцца на зямлю. З-за гэтага забруджванне ахоплівае вялікія тэрыторыі.
Таксічны дым і заражаная вада: у расійскім Туапсэ скардзяцца, што пасля атакі БПЛА курортны сезон «скончыўся, так і не пачаўшыся».
Па ацэнцы эколага Яўгена Віцішка, курортны сезон у раёне «скончыўся, не паспеўшы пачацца». Ён дадаў, што рэгіён не бачыў падобнай катастрофы як мінімум 20 гадоў. Наступствы, у прыватнасці забруджванне рэк, глебаў і паветра, могуць цягнуцца дзесяцігоддзямі.
Найбольшай праблемай цяпер з'яўляецца забруджванне паветра. Паводле дадзеных Greenpeace, дым утрымлівае таксічныя газы, хімічныя пары і часціцы сажы. Паводле інфармацыі мясцовага аператыўнага штаба, у шэрагу раёнаў канцэнтрацыі бензолу, ксілолу і сажы перавысілі бяспечныя паказчыкі ў два-тры разы.
З-за гэтага мясцовыя ўлады рэкамендавалі жыхарам заставацца дома, не адчыняць вокны і выкарыстоўваць сродкі абароны. Нягледзячы на гэта, частку навучальных устаноў закрылі толькі праз некалькі дзён пасля пагаршэння сітуацыі.
Забруджванне закранула і ваду: нафтапрадукты могуць трапляць у раку Туапсэ, а адтуль у мора. Нягледзячы на заявы ўладаў пра лакалізацыю разліву, на ўзбярэжжы выяўляюць нафтавыя плямы, якія, верагодна, трапляюць у мора з пашкоджаных рэзервуараў. Эколагі адзначаюць, што пераадоленню наступстваў перашкаджаюць галькавыя пляжы, праз якія мазут прасочваецца ў глебу і вяртаецца ў ваду.
Пажар у Туапсэ ўзнік пасля двух удараў беспілотнікаў па порце. 16 красавіка ўспыхнуў нафтаперапрацоўчы завод. Пажар ліквідавалі за тры дні. Пазней, 19 красавіка, у моры выявілі нафтавую пляму, а ўжо 20 красавіка з-за паўторнага ўдару аб'ект успыхнуў ізноў.
Па стане на 23 красавіка пажар дагэтуль працягваецца. Аднак яго плошча скарацілася прыкладна ўдвая.