Bloomberg: Швецыя прымусіла расійскія танкеры абмінаць свае воды

• 24.04.2026, 13:38

Улады краіны ўзмацнілі праверкі суднаў «ценявога флоту».

Танкеры, звязаныя з Расіяй, пачалі абмінаць шведскія воды ў Балтыйскім моры пасля ўзмацнення даглядаў з боку Швецыі, паведамляе Bloomberg (пераклад — сайт Charter97.org).

Паводле звестак трэкінгу суднаў, з 22 танкераў, што пад санкцыямі і прайшлі праз рэгіён з 7 красавіка, 13 змянілі маршрут і выбралі больш паўднёвы шлях — праз раён дацкага вострава Борнхольм. Раней большасць суднаў ішла больш кароткім маршрутам бліжэй да ўзбярэжжа Швецыі.

Змену маршрутаў звязваюць з узмацненнем кантролю над так званым «ценявым флотам», які выкарыстоўваецца для перавозкі расійскай нафты ў абыход санкцый. Цяпер судны вымушаныя ісці больш доўгімі і затратнымі шляхамі.

Шведская берагавая ахова ў апошнія месяцы правяла шэраг праверак. У сакавіку былі дагледжаныя танкеры «Sea Owl 1» і «Caffa» па падазрэнні ў выкарыстанні фальшывых сцягоў. У красавіку праверка судна «Flora 1» праводзілася ў межах расследавання магчымага разліву нафты, аднак абвінавачанні не пацвердзіліся.

Прэм’ер-міністр Швецыі Ульф Крістэрсан заявіў, што такія захады накіраваныя на абарону тэрытарыяльных вод і ствараюць дадатковыя складанасці для «ценявога флоту».

Данія прытрымліваецца больш асцярожнага падыходу, узмацняючы кантроль за дакументамі, але не затрымліваючы судны, спасылаючыся на свабоду суднаходства.

Раней аналагічныя змены маршрутаў фіксаваліся і ў Ла-Маншы пасля заяў Вялікабрытаніі пра магчымыя меры супраць санкцыйных танкераў.