У РФ заявілі, што патушылі пажар на НПЗ у Туапсэ

• 25.04.2026, 6:06

Пяць дзён змагаліся з агнём.

У Расіі вечарам пятніцы, 24 красавіка, заявілі, што пажар, які ўзнік на марскім тэрмінале ў Туапсэ пасля атакі дронаў у ноч на 20 красавіка, удалося патушыць. Пра гэта піша расійскае агенцтва «Інтэрфакс».

«У Туапсэ на тэрыторыі марскога тэрмінала поўнасцю патушылі пажар. (...) Пяць дзён каля 300 чалавек змагаліся з агнём», — паведаміў губернатар Краснадарскага краю Веніямін Кандрацьеў.

Паводле даных аператыўнага штаба рэгіёна, на тэрыторыі горада працягваюцца лівні, з-за чаго паднялася вада ў рацэ Туапсэ і адбыўся пераліў нафтапрадуктаў праз раней устаноўленыя бонавыя загараджэнні. У русле ракі, ніжэй па цячэнні, арганізавалі збор нафтапрадуктаў, якія часткова трапілі ў акваторыю мора, а таксама на берагавую лінію.

З-за моцнага пажару ў горадзе рэзка пагоршылася якасць паветра, выпалі «нафтавыя» дажджы.

У панядзелак беспілотнікі атакавалі марскі порт Туапсэ, у выніку чаго пачаўся пажар і была пашкоджаная транспартная інфраструктура. Раней Туапсэ падвергнуўся атаке БПЛА 16 красавіка, абломкі ўпалі на тэрыторыі прадпрыемстваў у раёне марскога порта, узнік пажар, які быў цалкам ліквідаваны 19 красавіка.

Тэрміналы нафтапрадуктаў чарнаморскага порта Туапсэ перагружаюць на экспарт нафту, мазут, вакуумны газойль і высокасерністае дызельнае паліва вытворчасці Туапсінскага НПЗ, Самарскай групы НПЗ і Саратаўскага НПЗ «Раснафты».