WP: Вэнса паставілі «на паўзу»

• 25.04.2026, 8:08

Ён не едзе ў Пакістан на перамовы з Іранам.

ЗША і Іран аднаўляюць перамовы ў Ісламабадзе ўжо ў гэтыя выхадныя, але гэтым разам склад амерыканскай дэлегацыі істотна змяніўся. Віцэ-прэзідэнта ЗША Джэя Дзі Вэнса на сустрэчы не будзе.

Пра гэта паведамляе The Washington Post.

Белы дом вырашыў накіраваць на перамовы спецыяльнага пасланніка Сціва Ўіткафа і зяця Трампа Джарэда Кушнэра. Яны разам з Вэнсам ужо ўдзельнічалі ў папярэдніх раундах дыялогу.

Віцэ-прэзідэнт Джэй Дзі Вэнс, які раней быў ключавой фігурай у абмеркаваннях, гэтым разам застанецца ў ЗША.

Прэс-сакратарка Белага дома Кэролін Лівітт адзначыла, што Вэнс знаходзіцца «ў рэжыме чакання». Ён вылеціць у Пакістан толькі ў тым выпадку, калі чыноўнікі «прызнаюць гэта неабходным выкарыстаннем яго часу».

Рашэнне не накіроўваць віцэ-прэзідэнта сведчыць пра зніжэнне ўзроўню чаканняў ад гэтай сустрэчы, адзначае выданне. Іран таксама пайшоў на аналагічны крок. Тэгеран не дэлегаваў свайго галоўнага перамоўшчыка — старшыню парламента Махамада Багера Галібафа.

У The Washington Post лічаць, што адсутнасць Вэнса дазволіць адміністрацыі ЗША лягчэй нівеляваць наступствы, калі Іран зноў вылучыць непрымальныя патрабаванні.

Аднак удзел Кушнэра і Ўіткафа можа дапамагчы інтэграваць у пагадненне стратэгічныя мэты Ізраіля. А гэта перш за ўсё спыненне падтрымкі групоўкі «Хізбала», руху «Хамас» і хусіцкіх баевікоў у Емене.