Forbes: «Лятучыя міны» змяняюць правілы вайны ва Украіне
- 26.04.2026, 0:10
Дроны, што заселі ў засадзе, — новая рэальнасць прыфрантавай зоны.
Абодва бакі на фронце ва Украіне актыўна выкарыстоўваюць новы тып беспілотнікаў — так званыя дроны-«чакуны», якія спалучаюць у сабе канцэпцыю супрацьтранспартнай або супрацьпяхотнай міны і дрона-камікадзэ. Як піша Forbes (пераклад — «УНІАН»), тактыка засад, контрзасад і супрацьдзеяння ім імкліва развіваецца.
Камандзір падраздзялення беспілотнікаў «Тайфун» Нацгвардыі Украіны з пазыўным «Майкл» тлумачыць, што за эфектнымі відэа з выкарыстаннем «чакуноў» стаіць складаная падрыхтоўка.
«Выбар мэты — першы крок. Мы дакладна вызначаем, на што палюем», — кажа баец.
Паводле слоў вайскоўца, загадзя абраная мэта можа быць рознай: ад лагістычных маршрутаў да пяхотных патрулёў або калонаў бранятэхнікі. Для падрыхтоўкі выкарыстоўваюць даныя радыёразведкі і разведвальных дронаў, каб стварыць базу маршрутаў і часу перамяшчэння праціўніка.
Выданне адзначае, што такія засады звычайна ажыццяўляюцца з дапамогай дронаў з валаконна-аптычным кіраваннем, бо радыёкіраваныя апараты губляюць сігнал пры зніжэнні да зямлі праз праблему радыягарызонту. Акрамя таго, валаконна-аптычныя дроны спажываюць менш энергіі, і іх складаней выявіць.
Праўда, пасадка застаецца адным з самых складаных этапаў.
«Выкананне патрабуе пошуку месца, якое забяспечвае маскіроўку і ў той жа час абараняе крохкі валаконна-аптычны кабель ад зачэпу або абрыву», — кажа «Майкл».
Дадатковыя цяжкасці ствараюць умовы надвор'я — дождж і снег могуць абцяжарваць кабель, а мароз здольны прыводзіць да яго замярзання.
Пасля размяшчэння дрон можа чакаць гадзінамі або нават цэлую ноч. Ключавая перавага — эфект нечаканасці.
«Мэты маюць усяго некалькі секунд, каб адрэагаваць пасля запуску дрона», — адзначае вайсковец, падкрэсліваючы, што гэта значна менш, чым у выпадку са звычайнымі FPV-дронамі.
У той жа час такія апараты маюць і недахопы — з-за дадатковага абсталявання яны нясуць меншы зарад.
Па ацэнках вайскоўца, цяпер да 10% валаконна-аптычных дронаў выкарыстоўваюцца менавіта для засад, і гэтая доля расце. Гэта дазваляе кантраляваць лагістычныя зоны і ствараць псіхалагічны ціск на праціўніка.
Супрацьдзеянне таксама эвалюцыянуе: бакі спрабуюць знішчаць варожыя дроны-«чакуны», калі тыя яшчэ знаходзяцца на зямлі. Для гэтага выкарыстоўваюць патрульныя беспілотнікі з цеплавізарамі.
«Нават у «спячым рэжыме» электроніка дрона генеруе цяпло. Уначы нерухомы дрон — яскравая мэта для цеплавізійных камер праціўніка», — распавядае «Майкл».
Адна з галоўных праблем — стомленасць аператараў, якія вымушаныя гадзінамі сачыць за экранам. Вырашэннем можа стаць выкарыстанне штучнага інтэлекту. У той жа час цалкам аўтаномныя баявыя дроны выклікаюць спрэчкі.
«Хаця тэхнічна гэта можа быць рэалізавана, гэта перасякае крытычную мяжу — чалавечае рашэнне па выбары мэты», — падкрэслівае вайсковец.
Як піша Forbes, гэты аспект вайны, на які знешнія назіральнікі звяртаюць мала ўвагі, насамрэч можа істотна змяніць тое, як вядуцца войны.
У будучыні палі бітваў могуць быць насычаныя вялікай колькасцю «разумных» дронаў-засад з працяглым часам чакання, што кардынальна зменіць характар вайны.
«Будучыя палі бітваў, верагодна, будуць кішэць вялікай колькасцю разумных, вытрывалых дронаў-засад», — гаворыцца ў публікацыі.