CNN: У Расіі нарастае народная незадаволенасць
- 26.04.2026, 17:27
Пуцін адказвае адзіным вядомым яму спосабам.
Праз амаль чатыры гады пасля пачатку поўнамаштабнага ўварвання Расіі ва Украіну Масква сутыкнулася з усплёскам незадаволенасці. У сваю чаргу праваахоўныя органы пачалі новую хвалю гучных палітычных рэйдаў і арыштаў.
Пра гэта піша CNN, канстатуючы, што на хвалю незадаволенасці расійскі дыктатар Уладзімір Пуцін рэагуе «адзіным вядомым яму спосабам».
Адключэнні інтэрнэту ў расійскіх гарадах закранулі звычайных грамадзян, і ў грамадстве ўзмацняецца супрацьдзеянне Крамлю.
Краіна сутыкнулася з эканамічнымі цяжкасцямі ваеннага часу, у той час як яе сілавыя структуры стрымліваюць пратэсты, а ваенны канфлікт на Блізкім Усходзе надаў вайне Масквы супраць Украіны нечаканы імпульс дзякуючы рэзкаму росту цэн на нафту, нагадвае CNN.
«Тым не менш рэпрэсіўны дзяржаўны апарат Расіі, верагодна, цяпер набірае абароты», — канстатуе аўтар артыкула, указваючы на хвалю гучных палітычных арыштаў і вобшукаў у апошнія тыдні.
Тым часам, піша CNN, расійскі ўрад адраджае прывіды савецкага мінулага.
Як адзін з апошніх такіх прыкладаў у артыкуле прыводзіцца вобшук у офісах аднаго з найбуйнейшых выдавецтваў краіны і затрыманне супрацоўнікаў у межах крымінальнай справы паводле таго, што ўлады РФ называюць «прапагандай ЛГБТК+».
Расія пры Уладзіміры Пуціне даўно варожа рэагуе на тое, што лічыць небяспечнымі ідэямі Захаду. Расійскі дыктатар пазіцыянуе сябе як абаронца традыцыйных каштоўнасцяў.
Пры гэтым выдавецкая сфера не адзіная, дзе ў Расіі звужаецца прастора для свабоды слова, адзначае CNN.
Так, у красавіку ў офісе газеты «Новая газета», сузаснавальнік якой у 2021 годзе атрымаў Нобелеўскую прэмію міру, былі праведзеныя вобшукі.
Прапагандысцкае агенцтва РІА Навіны, са спасылкай на МУС, паведаміла, што журналіст Алег Ралдугін затрыманы для допыту па справе аб нібыта незаконным абыходжанні з персанальнымі данымі. Сам журналіст падчас судовага пасяджэння па выбары меры стрымання сваёй віны не прызнаў.
Пасля поўнамаштабнага ўварвання РФ ва Украіну выданне было вымушана закрыць сваю друкаваную версію, аднак анлайн «Новая газета» працягвае працу. Праведзеныя вобшукі яшчэ больш адсоўваюць рэшткі незалежнай прэсы на ўзбочыну.
Адначасова з атакай на СМІ Крэмль таксама адраджае былыя сімвалы палітычных рэпрэсій, адзначае CNN. На днях Акадэмію ФСБ Расіі, дзе Уладзімір Пуцін праходзіў падрыхтоўку як агент КДБ, перайменавалі ў гонар Фелікса Дзяржынскага — заснавальніка савецкай тайнай паліцыі.
CNN таксама звяртае ўвагу на шэраг іншых падзей, якія сведчаць, што Масква, верагодна, нацэленая на захаванне змрочнага таталітарнага мінулага краіны.
Тым часам сам расійскі дыктатар дэманструе абыякавасць. Толькі ў чацвер, 23 красавіка, Пуцін упершыню наўпрост адрэагаваў на скаргі расіян адносна абмежаванняў мабільнага інтэрнэту ў Расіі.
Расійскі дыктатар заявіў, што гэта «звязана з аператыўнай працай па прадухіленні тэрарыстычных актаў». Пры гэтым ён даў зразумець, што грамадству не трэба ведаць усе падрабязнасці.
Рэзюмуючы, CNN адзначае, што ніякіх прыкмет аслаблення рэпрэсій спецслужбаў РФ супраць насельніцтва не назіраецца.
На пачатку красавіка аналітыкі Інстытута вывучэння вайны (ISW) канстатавалі, што Крэмль за апошні час сутыкнуўся з больш жорсткай рэакцыяй з боку насельніцтва РФ праз узмацненне цэнзуры, чым чакала Масква.
Рэйтынг даверу да Уладзіміра Пуціна з 22 сакавіка ўпаў на пяць працэнтных пунктаў (з 76% да 71%), сведчаць даныя апытання Фонду грамадскай думкі (ФОМ). Гэта стала самым вялікім падзеннем рэйтынгу даверу да Пуціна з 2019 года.
Штотыднёвыя апытанні ФОМ паказваюць, што рэйтынг даверу да Пуціна пастаянна зніжаецца з 8 лютага 2026 года.