У Польшчы апеляцыі дазваляюць адмяніць 74% адмоваў у выдачы віду на жыхарства

• 28.04.2026, 11:11

Беларусам да ведама.

Упраўленне па справах замежнікаў Польшчы ў I квартале 2026 года разгледзела 5,3 тыс. апеляцый на адмовы ў выдачы віду на жыхарства. У 74% выпадкаў орган адмяніў рашэнне, прынятае ў першай інстанцыі. Асабліва часта орган станавіўся на бок заяўнікаў у справах аб часовым відзе на жыхарства. Пра гэта сведчыць квартальны справаздачны даклад, апублікаваны ведамствам, заўважыў Most.

Замежнік, які не згодны з рашэннем ваяводы па справах аб часовым і сталым відзе на жыхарства або статусе доўгатэрміновага рэзідэнта ЕС, можа абскардзіць рашэнне ў Упраўленні па справах замежнікаў (UDSC).

У студзені—сакавіку 2026 года гэты орган зарэгістраваў 6180 апеляцый і вынес 5287 рашэнняў. Значная частка апеляцый была разгледжана пазітыўна. У 2040 выпадках (34,7%) было прынята рашэнне на карысць заяўніка. 1198 рашэнняў першай інстанцыі (20,3%) былі адменены, а справы вярнутыя на паўторны разгляд.

Часцей за ўсё — 5334 разы — у UDSC абскарджвалі рашэнні па справах аб часовым відзе на жыхарства. Упраўленне вынесла 4425 рашэнняў: у 1927 выпадках (43,6%) орган прыняў рашэнне на карысць заяўніка, 1029 разоў (23,3%) адмяніў рашэнне першай інстанцыі і накіраваў справу на новы разгляд. 954 разы (21,6%) падтрымаў адмову ваяводы і ў 444 выпадках (10%) прыняў «іншае рашэнне».

Інакш выглядае сітуацыя з выдачай карт рэзідэнта. За тры месяцы UDSC атрымаў 458 апеляцый на адмовы ў наданні статусу доўгатэрміновага рэзідэнта ЕС і вынес 433 рашэнні. У 199 выпадках (46%) орган падтрымаў рашэнні ваяводскіх ужондаў, у 117 выпадках (27%) вярнуў справу на паўторны разгляд і толькі 63 разы (14,5%) вынес рашэнне на карысць замежніка.

Апеляцый на рашэнні аб сталым побыце было 325, а рашэнняў вынесена 320. У 181 выпадку (56%) UDSC падтрымаў адмову, вынесеную ў першай інстанцыі. 48 рашэнняў (15%) прынята на карысць заяўніка, і 43 справы (13,4%) былі накіраваныя на новы разгляд.

Акрамя таго, у I квартале 2026 года UDSC вынес 54 рашэнні па праязных дакументах замежніка: у 33 выпадках падтрымаў рашэнне органа першай інстанцыі, у пяці выпадках накіраваў справу на новы разгляд, у 12 — прыняў «іншае рашэнне» і толькі адзін раз прыняў рашэнне на карысць заяўніка.