Гарналыжны комплекс «Лагойск» выстаўлі на продаж

• 28.04.2026, 13:50

Пачатковая цана — $8,19 млн.

Гарналыжны спартыўна-аздараўленчы комплекс «Лагойск» можа знайсці новага ўладальніка — яго выстаўлі на аўкцыён.

На таргі выстаўлена прадпрыемства як маёмасны комплекс з кадастравым/інвентарным нумарам 0000381. У яго ўваходзяць маёмасць і маёмасныя правы ГСОК «Лагойск». Аб’ект размешчаны ў Лагойскім раёне Мінскай вобласці. У дакументах пазначана, што ён адносіцца да небяспечных вытворчых аб’ектаў.

Поўны пералік маёмасці размешчаны ў дакументах да таргоў на пляцоўцы e-auction.by.

Даўжніком пазначана ТАА «ТРАЙПЛ».

Пачатковы кошт маёмасці складае 23 195 052,26 рублёў, або прыблізна $8,19 млн па курсе Нацбанка.

Для ўдзелу ў таргах трэба ўнесці задатак — 2 319 505,23 рублёў, гэта каля $819 тыс. і прыкладна 10% ад пачатковага кошту аб’екта.