Навукоўцы стварылі найвялікшую 3D-карту Сусвету

• 29.04.2026, 0:06

47 мільёнаў галактык.

Навукоўцы завершылі стварэнне найбуйнейшай высокадакладнай 3D-карты Сусвету, выкарыстаўшы даныя больш як 47 мільёнаў галактык і квазараў. Яна можа дапамагчы зразумець цёмную энергію — сілу, што паскарае пашырэнне Сусвету.

Пра гэта піша Science daily.

Праект рэалізавалі ў рамках міжнароднага супрацоўніцтва DESI. За пяць гадоў назіранняў навукоўцы таксама зафіксавалі каля 20 мільёнаў зорак. Атрыманыя даныя ўжо даюць новае ўяўленне пра структуру Сусвету і яго эвалюцыю з цягам часу.

Даследчыкі адзначаюць, што цёмная энергія складае прыблізна 70% Сусвету і можа паводзіць сябе не так, як лічылася раней. Сабраныя вымярэнні дапамогуць праверыць існуючыя тэорыі пра суадносіны матэрыі і цёмнай энергіі і могуць змяніць разуменне будучыні космасу.

У праекце ўдзельнічалі больш за 900 навукоўцаў з больш як 70 устаноў. Нягледзячы на цяжкасці, у прыватнасці перабоі з электрычнасцю з-за лясных пажараў у 2022 годзе, камандзе ўдалося завяршыць працу раней за запланаваны тэрмін і сабраць больш даных, чым чакалася.

Цяпер навукоўцы рыхтуюцца апрацаваць поўны масіў інфармацыі, а першыя вынікі чакаюцца ў 2027 годзе. Назіранні працягнуцца да 2028 года, каб яшчэ падрабязней даследаваць будову Сусвету.