40 краін абмеркавалі бяспеку суднаходства ў Армузскім праліве

• 3.04.2026, 3:00

Удзельнікі сканцэнтраваліся на дыпламатыі.

Каля 40 краін у чацвер, 2 красавіка, абмеркавалі на відэаканферэнцыі, скліканай па ініцыятыве Вялікабрытаніі, пытанне пра тое, як аднавіць бяспечнае суднаходства праз Армузскі праліў. «Мы сканцэнтраваныя на дыпламатычных і міжнародных мерах планавання, уключаючы сумесную мабілізацыю ўсяго арсеналу дыпламатычных і эканамічных інструментаў і рычагоў уплыву», — заявіла міністр замежных спраў Вялікабрытаніі Івет Купер на пачатку сустрэчы.

Пры гэтым гаворка не ідзе пра сілавое адкрыццё праліву, якое прапаноўвалі ЗША, — цяпер Армуз кантралюецца Іранам. Цэнтральнай тэмай перамоваў, арганізаваных Лонданам, стала забеспячэнне дастатковай упэўненасці ў суднаўладальнікаў для аднаўлення праходу суднаў праз Армузскі праліў, а таксама зніжэнне страхавых прэмій, перадае DW.

Івет Купер назвала пазіцыю Тэгерана безразважнай, падкрэсліўшы, што блакада Армуза пагражае эканамічнай бяспецы ўсяго свету. Іран захапіў міжнародны суднаходны маршрут, узяўшы сусветную эканоміку ў закладнікі, — заявіла кіраўніца брытанскага МЗС на канферэнцыі, у якой, сярод іншых, удзельнічалі Германія, Францыя, Канада, Аб'яднаныя Арабскія Эміраты і Індыя. ЗША не былі прадстаўленыя. Шэраг краін накіраваў на сустрэчу прадстаўнікоў ніжэйшага за ўзровень міністра замежных спраў рангу.