Беларускім інтэрнэт-крамам забаранілі ўказваць цэны ў доларах і еўра

• 3.04.2026, 9:58

МАРТ ужо выдала 18 «рэкамендацый».

Беларус паскардзіўся ў МАРТ на тое, што кошт нерухомасці пазначаюць у замежнай валюце. У выніку ведамства зацікавілася інтэрнэт-крамамі, якія на сваіх сайтах прывязваюць кошт, напрыклад, да долара або еўра. Такія цэны ім давядзецца прыбраць, паведамілі у прэс-службе МАРТ.

Паведамляецца, што пытанне пра валютны кошт нерухомасці было адным з тых, якія паступілі міністру антыманапольнага рэгулявання і гандлю падчас асабістага прыёму грамадзян і юрыдычных асоб.

У сувязі з гэтым МАРТ ужо выдала 18 рэкамендацый інтэрнэт-рэсурсам, што рэкламуюць турыстычныя паслугі, нерухомасць, аўтамабілі і іншыя тавары з указаннем іх кошту ў замежнай валюце. Напрыклад, сярод іх былі ТАА «ДАТА ТУР», ТАА «Твая Сталіца», ТАА «ЭлектроЭваКарс», ТАА «Бонусторг».

Ім настойліва рэкамендавана прыбраць інфармацыю пра кошт тавараў або паслуг у валюце, указаўшы кошт у беларускіх рублях, каб не ўводзіць спажыўцоў у зман.

МАРТ нагадала ўладальнікам інтэрнэт-рэсурсаў, што на тэрыторыі Беларусі разлікі за турыстычныя паслугі, нерухомасць, аўтамабілі і іншыя тавары ажыццяўляюцца выключна ў беларускіх рублях.

І грашовыя абавязацельствы павінны быць выражаныя ў беларускіх рублях, пра гэта гаворыць частка 1 пункта 1 артыкула 298 Грамадзянскага кодэкса Рэспублікі Беларусь. Гэта ж датычыцца і цаны тавараў і прадукцыі грамадскага харчавання (калі іншае не ўстаноўлена актамі заканадаўства) — гэта прадугледжана пастановай Савета Міністраў Рэспублікі Беларусь №703 ад 22 ліпеня 2014 года.

Ведамства абяцае працягваць маніторынг інтэрнэт-рэсурсаў.