Макрон заклікаў «не быць васаламі ЗША і Кітая»

• 3.04.2026, 16:27

Прэзідэнт Францыі звярнуўся да сярэдніх дзяржаў.

Французскі прэзідэнт Эманюэль Макрон заклікаў сярэднія дзяржавы аб’яднаць намаганні і супрацьстаяць ЗША і Кітаю, піша Bloomberg.

«Наша мэта — не быць васаламі дзвюх гегеманічных дзяржаў. Мы не хочам залежаць ад дамінавання, скажам, Кітая, або не хочам быць занадта ўразлівымі перад непрадказальнасцю ЗША», — сказаў ён падчас выступлення перад студэнтамі ў Сеуле.

Макрон адзначыў, што еўрапейскія краіны маюць сумесную праграму дзеянняў з такімі краінамі, як Японія і Паўднёвая Карэя, па такіх пытаннях, як міжнароднае права, дэмакратыя, змена клімату і глабальная ахова здароўя.

Таксама ён назваў і іншыя краіны, якія падзяляюць такія погляды: Аўстралію, Бразілію, Канаду і Індыю.

Паводле слоў лідара Францыі, разам гэтая кааліцыя можа працаваць над штучным інтэлектам, космасам, энергетыкай, ядзернай энергетыкай, абаронай, бяспекай — і «чым заўгодна».

Выданне адзначае, што заявы Макрона прагучалі на фоне таго, што прэзідэнт ЗША Дональд Трамп «аднавіў свае напады на НАТА і іншых саюзнікаў», у прыватнасці, раскрытыкаваў Францыю і Паўднёвую Карэю за недастатковую дапамогу яму ў Іране.

«ЗША — вялікая краіна, але сваім цяперашнім падыходам яна рызыкуе адкрыць «скрыню Пандоры», — сказаў Макрон.