У Мінску «шалеюць» цэны на арэнду жылля
- 3.04.2026, 20:16
Колькі будзе каштаваць аднапакаёвая кватэра?
Беларусы ў сацсетках працягваюць абмяркоўваць цэны на арэнду жылля ў Мінску. Напрыклад, аўтарка роліка ў TikTok адзначыла, што «на кватэры такі конкурс, што арэндадаўцы могуць сабе дазволіць ставіць на «бабуліны» цэны вышэй за 250 долараў».
Тым часам, як высветлілася, у сталіцы ўсё ж можна знайсці адносна даступныя варыянты. «Зеркало» сабрала найбольш даступныя варыянты, дзе можна жыць.
Два варыянты за 230 долараў
На пляцоўцы kufar.by цэны на кватэры, у якіх можна жыць (г. зн. не з голымі сценамі і прынамсі з мінімальным наборам мэблі і тэхнікі), пачынаюцца ад 230 долараў.
Адна з іх знаходзіцца на праездзе Галадзеда ў Чыжоўцы. Яе плошча — 48,8 кв. м. У жыллі раздзельны санвузел. У кватэры зроблены касметычны рамонт. У ёй ёсць неабходная бытавая тэхніка, але пра спальное месца арандатарам давядзецца паклапаціцца самім. У кватэры не хочуць бачыць арандатараў з жывёламі.
Кошт — 675,49 рублёў у месяц (230 долараў). Камунальныя плацяжы ў гэтую суму не ўваходзяць.
За тую ж цану прапануюць аднапакаёўку на праспекце Ракасоўскага. У гэтым выпадку плошча жылля — 37,7 кв. м, санвузел таксама раздзельны.
Але яе здаюць толькі на паўгода.
Прапановы на 20 долараў больш
Трошкі даражэй ёсць варыянт на вуліцы Шчарбакова. Кватэра займае 30,4 кв. м, з сумешчаным санвузлом, рамонтам, неабходнай мэбляй і тэхнікай.
Замежнікам гатовы дапамагчы з рэгістрацыяй. Але жыллё здаюць толькі на шэсць месяцаў.
Кошт — 734,22 рублёў у месяц, або 250 долараў.
Тыя ж 734,22 рублёў просяць за арэнду кватэры на вуліцы Брэстскай. У ёй, акрамя мэблі і тэхнікі, таксама ёсць Wi‑Fi.
«Кватэра здаецца па дагаворы арэнды. Для замежных грамадзян цана будзе крыху вышэйшая, робяць рэгістрацыю па месцы знаходжання», — пазначана ў аб’яве.
Яшчэ адзін варыянт ёсць на вуліцы Барадзінскай. Арэндадавец каротка адзначыў у аб’яве: «Кватэра на працяглы тэрмін». Гэта жыллё плошчай 37 кв. м на другім паверсе дзевяціпавярхоўкі. Цана, як і ў пазначаных вышэй, — 734,22 рублёў, або 250 долараў.
Плюс яшчэ 10 долараў
За 763,59 рублёў у месяц, або 260 долараў, можна арандаваць жыллё на вуліцы Нестэрава. Як і іншыя варыянты, гэта цёплая аднапакаёўка ў «добрым стане». Яе плошча — 36 кв. м, яна размешчана на чацвёртым паверсе дома 1982 года.
Гэты варыянт прапануюць толькі «прыстойным і акуратным грамадзянкам Беларусі (1, 2 грамадзянкі) без шкодных звычак, дзяцей, жывёл». У кватэры ёсць кладоўка, а таксама шафа для гаспадарчых патрэб на пляцоўцы, інтэрнэт і кабельнае ТБ.
За тую ж цану выставілі для арэнды жыллё на вуліцы Кабушкіна. Яго плошча крыху меншая — 30 кв. м, але, судзячы па фота, у ім новая кухня. Ёсць мэбля і неабходная бытавая тэхніка. Кватэра не падыходзіць для тых, хто курыць, і для тых, у каго ёсць жывёлы.
Іншыя ўмовы
На вуліцы Кальцова прапануюць аднапакаёвую кватэру ў 36 кв. м на другім паверсе пяціпавярхоўкі 1968 года.
Здаць яе гатовы «актыўнай, энергічнай жанчыне» перадпенсійнага або ранняга пенсійнага ўзросту не маладзей за 50 гадоў, грамадянцы Беларусі. Жыллё здаюць з умовай дапамогі па гаспадарцы пажылому самадастатковаму мужчыну, які жыве непадалёк. «Асобныя ўмовы для жанчын, якія працуюць у медыцынскай сферы», — пазначана ў аб’яве.
Цана пазначана 200 рублёў у месяц (ці 68,1 долара). Але ў аб’яве арэндадавец падкрэсліў, што гэтая сума будзе за камуналку. Атрымліваецца, што жыллё здаюць бясплатна.