У Смаргоні арыгінальна пачалі футбольны сезон

• 4.04.2026, 19:17

Перад гульнёй мяч суддзі даставілі незвычайным спосабам.

У суботу стартаваў чэмпіянат Беларусі ў першай лізе. У Смаргоні да адкрыцця сезона вырашылі падысці арыгінальна: мяч суддзі прывезлі на маленькім трактары.

Звычайна суддзі выходзяць на поле з падтрыбуннага памяшкання з мячом у руках або бяруць яго са спецыяльнай падстаўкі. Аднак у Смаргоні перад матчам мясцовай каманды з мінскім «Юні Ікс Лабс» вырашылі адысці ад звыклага сцэнару. За хвіліну да стартовага свістка да поля пад’ехаў трактар. Да яго падышоў арбітр Уладзімір Полтаржыцкі, узяў мяч і ўжо з ім накіраваўся да цэнтральнага круга, паведамляе Onlíner.

Лагічнае пытанне: у чым сэнс такога перформансу? Адказ просты — у Смаргоні працуе агрэгатны завод, які выпускае міні-трактары і матаблокі. Такім чынам, заўзятарам, відаць, вырашылі нагадаць пра мясцовае прадпрыемства.

Пачатак сезона ў гаспадароў перад сваімі заўзятарамі не атрымаўся. Смаргонцы саступілі гасцям з лікам 0:3.