У Беларусі распрацавалі катлеты і паштэт з люпіну

• 4.04.2026, 20:58

Іх могуць запусціць у вытворчасць у найбліжэйшы час.

Беларускія вучоныя працуюць над новымі прадуктамі для вегетарыянцаў на аснове айчыннай сыравіны. Ідзе пра посныя катлеты і паштэты з харчовага люпіну — культуры, якую вырошчваюць у краіне. Пра гэта паведамілі у Навукова-практычным цэнтры НАН па харчаванні.

Паводле слоў малодшай навуковай супрацоўніцы Вольгі Чэкун, попыт на раслінныя прадукты ў Беларусі расце, але рынак пакуль абмежаваны. «У гатовым выглядзе іх пакуль вельмі мала. У асноўным гэта пасты на аснове нуту і тофу. Пры гэтым сыравіна для такіх прадуктаў — амаль уся імпартная», — адзначыла яна.

Кожны год Беларусь закупляе сою амаль на 60 млн долараў, а нут — прыблізна на паўмільёна. Імпарт павялічваецца ўслед за попытам. У НАН разлічваюць скараціць залежнасць ад замежнай сыравіны за кошт выкарыстання люпіну.

Вучоныя прапанавалі некалькі варыянтаў прадукцыі. Першы — посны паштэт, які можна выкарыстоўваць як намазку або соус. Другі — катлеты з даданнем крупаў і гародніны. Адзін варыянт уключае пшано, моркву і цыбулю і на смак нагадвае фалафель. Яшчэ адзін — з перлаўкай, грыбамі, цыбуляй і морквай. Такі прадукт плануюць выпускаць як замарожаны паўфабрыкат.

Харчовы люпін адрозніваецца ад кармавога нізкім утрыманнем алкалоідаў. Каб дадаткова знізіць іх узровень, у цэнтры распрацавалі тэхналогію апрацоўкі: сыравіну вымочваюць і апрацоўваюць паветрана-азонавай сумессю.

Распрацоўкі ўжо прадставілі ў сакавіку 2026 года на конкурсе «100 ідэй для Беларусі». Цяпер спецыялісты дапрацоўваюць рэцэптуры і рыхтуюць дакументы для запуску ў вытворчасць. У перспектыве распрацоўкі могуць з’явіцца на айчынных кансервавых прадпрыемствах і на тых, што вырабляюць замарожаную прадукцыю. А грамадскае харчаванне зможа дадаць у меню знаходку беларускіх вучоных, прыгатаваўшы ўсё гэта са свежых прадуктаў.