Германія прапанавала адмовіцца ад прынцыпу аднагалоснасці ў ЕС

• 5.04.2026, 2:14

Прычына — блакаванні з боку Орбана.

Міністр замежных спраў Германіі Ёган Вадэфуль лічыць, што дзеяздольнасць Еўрапейскага саюза знаходзіцца пад пагрозай з-за перашкод з боку асобных краін, таму ён выступае за іншы падыход да прыняцця рашэнняў у сферы знешняй палітыкі і палітыкі бяспекі.

Пра гэта ён сказаў у інтэрв’ю нямецкай медыягрупе «Funke», перадае Tagesschau.

Вадэфуль спадзяецца, што Еўрапейскі саюз у хуткім часе ў значнай ступені адмовіцца ад прынцыпу аднагалоснасці.

«Каб быць эфектыўным гульцом на міжнароднай арэне, каб сапраўды дасягнуць сталасці, мы ў ЕС павінны скасаваць прынцып аднагалоснасці ў знешняй палітыцы і палітыцы бяспекі да заканчэння гэтага заканадаўчага перыяду», — заявіў ён.

Вадэфуль сказаў, што выступае за працу ЕС «з сістэмай кваліфікаванай большасці».

«Увесь наш досвед апошніх тыдняў адносна дапамогі Украіне і санкцый супраць Расіі сведчыць на карысць гэтага», — падкрэсліў кіраўнік МЗС Германіі.

У гэтым кантэксце варта нагадаць, што прэм’ер-міністр Венгрыі Віктар Орбан блакуе прадастаўленне ЕС крэдыту для Украіны на суму 90 млрд еўра.