У Азоўскім моры патанула судна з расіянамі на борце

• 5.04.2026, 16:08

Расійскія СМІ заяўляюць пра атаку БПЛА.

Судна з грузам пшаніцы патанула ў Азоўскім моры ля берагоў Херсонскай вобласці. Расійскія прапагандысты сцвярджаюць, што сухагруз быў атакаваны БПЛА.

Так званы «губернатар» часова акупаванай часткі Херсонскай вобласці Уладзімір Сальда паведаміў у Telegram, што крушэнне пацярпела судна тыпу «Волга-Балт».

Да берага Херсонскай вобласці з дапамогай лодкі-капсулы здолелі дабрацца дзевяць членаў экіпажа — усе яны грамадзяне Расіі.

Старэйшы памочнік капітана 1991 года нараджэння загінуў. Яшчэ двое чалавек зніклі.

Прычыну крушэння судна Сальда ўдакладняць не стаў.

Расійскае прапагандысцкае агенцтва ТАСС са спасылкай на крыніцу ў аператыўных службах сцвярджае, што сухагруз атакаваў беспілотнік. Гэта адбылося ў 300 мілях на поўнач ад акупаванай расіянамі Керчы.

Паводле звестак прапагандыстаў, загінулі двое чалавек.

З дзевяці чалавек, якія на лодцы-капсуле дабраліся да берага часова акупаванага Расіяй сяла Шчасліўцава, адзін быў ужо мёртвы.

Сухагруз нібыта быў атакаваны ў раёне Арабатскай стрэлкі непадалёк ад акупаванага Генічэска, піша «Коммерсант».

«Волга-Балт» — гэта тып савецкіх і расійскіх сухагрузных суднаў змяшанага (рака-мора) плавання, прызначаных для перавозкі навальных і сыпкіх грузаў па ўнутраных водных шляхах з магчымасцю выхаду ў прыбярэжныя марскія раёны.