У ЗША павялічылася колькасць бараў і рэстаранаў, дзе забаронена карыстацца тэлефонамі

• 5.04.2026, 17:11

Такія ўстановы ёсць прынамсі ў 11 штатах.

Прынамсі ў 11 штатах ЗША ёсць бары і рэстараны, дзе наведвальнікам забаронена карыстацца мабільнымі тэлефонамі і іншымі гаджэтамі (phone-free). Як адзначае выданне Axios, усё часцей такія патрабаванні ўводзяць не толькі асобныя ўстановы, але і сеткі. Судзячы з наведвальнасці такіх месцаў, наведвальнікам падабаецца магчымасць адарвацца ад гаджэтаў і спакойна правесці час за ежай і жывымі зносінамі.

Асобныя бары і рэстараны phone-free ёсць, сярод іншага, у Каліфорніі, Ілінойсе, Нью-Ёрку і Тэхасе. А больш за ўсё такіх — адразу пяць — у Вашынгтоне (акруга Калумбія). Сярод сетак палітыку «лічбавага дэтаксу» выкарыстоўвае сетка папулярных клубных рэстаранаў Delilah’s, якая мае ўстановы ў Даласе, Лас-Вегасе, Лос-Анджэлесе і Маямі. Аналагічнае рашэнне прыняла і сетка рэстаранаў хуткага харчавання Chick-fil-A для двух са сваіх устаноў. У такіх месцах наведвальнікам прапануюць альбо здаць тэлефон у камеру захоўвання, альбо пакласці яго ў спецыяльны чахол з магнітным замком. Кліенты адзначаюць, што дзве гадзіны без тэлефона далі ім «неперадаваемыя адчуванні свабоды, поўнага адключэння», «глыбокую ўвагу да суразмоўцаў», «ўзмацненне пачуццяў да другой палавінкі».

Ранейшае даследаванне Consumer Affairs паказала, што сярэднестатыстычны амерыканец правярае свой смартфон 144 разы на дзень і праводзіць у гаджэтах чатыры з паловай гадзіны штодня. Паводле ацэнак Talker Research, найбольш хочуць адключыцца ад гаджэтаў прадстаўнікі пакалення Z (1997–2012 гадоў нараджэння) — 63%. У міленіялаў (1981–1996) удзельная вага складае 57%, у прадстаўнікоў пакалення X (1965–1980) — 42%. Найменш хацелі б развітацца з гаджэтамі тыя, хто нарадзіўся ў 1946–1964 гадах.