Зяленскі сустрэўся з прэзідэнтам Сірыі

• 5.04.2026, 21:32

Дамовіліся працаваць у сферы бяспекі і эканомікі.

Прэзідэнт Украіны Уладзімір Зяленскі правёў перамовы з прэзідэнтам Сірыі Ахмедам аш-Шараа. Па выніках сустрэчы паміж краінамі дасягнутыя дамоўленасці.

Пра гэта паведамляе Charter97.org са спасылкай на Telegram прэзідэнта Украіны.

Паводле слоў Зяленскага, Украіна і Сірыя дамовіліся працаваць разам, каб забяспечыць больш бяспекі і магчымасцяў для развіцця «нашым грамадствам». Таксама бакі абмеркавалі шэраг пытанняў і маюць зацікаўленасць у абмене досведам.

«Абмеркавалі сітуацыю ў рэгіёне і перспектывы яе змянення да лепшага. Абмеркавалі і абставіны вайны Расіі супраць Украіны, удзячны за падтрымку. Ёсць вялікая зацікаўленасць у абмене вайсковым досведам і досведам у сферы бяспекі. Дзякуй за словы павагі да нашых людзей», — праінфармаваў прэзідэнт.

Акрамя таго, бакі закранулі тэму ролі Украіны як надзейнага пастаўшчыка харчовай прадукцыі. У гэтым кантэксце лідары абмеркавалі сумесныя магчымасці краін узмацніць гэта ва ўсім рэгіёне.

«Вельмі добра разумеем, якія энергетычныя і інфраструктурныя выклікі цяпер мае Сірыя. Гатовыя працаваць разам, каб магчымасці нашых дзяржаў і народаў павялічваліся», — дадаў Зяленскі.