Ва Украіне адхілілі датычнасць да выбухоўкі каля газаправода, які ідзе ў Венгрыю

• 6.04.2026, 6:14

Кіеў намякнуў на Расію.

Кіеў адхіліў здагадкі венгерскіх уладаў аб магчымай датычнасці Украіны да спробы падрыву газаправода ў Сербіі. Пра гэта 5 красавіка заявіў прадстаўнік МЗС Георгій Ціхі у сацсетцы X.

Па яго словах, інцыдэнт з выяўленнем выбухоўкі каля газаправода, па якім расійскі газ паступае ў Венгрыю, можа быць аперацыяй Расіі «пад чужым сцягам», накіраванай на ўплыў на грамадскія настроі перад парламенцкімі выбарамі.

Раней прэм’ер-міністр Венгрыі Віктар Орбан склікаў экстраннае пасяджэнне савета бяспекі пасля таго, як прэзідэнт Сербіі Аляксандар Вучыч паведаміў пра знойдзеную выбухоўку непадалёк ад газаправода «Балканскі паток». Орбан наўпрост Украіну не абвінаваціў, аднак адзначыў, што Кіеў на працягу многіх гадоў спрабуе скараціць залежнасць Еўропы ад расійскіх энергарэсурсаў.

З аналагічнай пазіцыяй выступіў і кіраўнік венгерскага МЗС Петер Сіярта. Ён заявіў, што тое, што адбылося, укладваецца ў логіку дзеянняў Украіны, накіраваных на зрыў паставак расійскіх энерганосьбітаў у Еўропу, і нагадаў, што Кіеў раней адмаўляў датычнасць да падрыву газаправода «Паўночны паток».

Нагадаем, у Сербіі каля газаправода, які ідзе ў Венгрыю, выявілі выбухоўку. Пра знаходку паведаміў прэзідэнт Сербіі Аляксандар Вучыч, пазней гэтую інфармацыю пацвердзіў прэм’ер-міністр Венгрыі Віктар Орбан. Абставіны інцыдэнту цяпер высвятляюцца.

Газаправод паміж Сербіяй і Венгрыяй функцыянуе як працяг другой ніткі «Турэцкага патоку» («Балканскі паток»), па ім газ ідзе з Расіі ў Турцыю праз Балгарыю, Сербію і Венгрыю.