Украіна перадала Азербайджану расійскага наёмніка

• 6.04.2026, 9:05

Яго чакае да 15 гадоў пазбаўлення волі.

Украіна дэпартавала ў Азербайджан 45‑гадовага наёмніка, які ваяваў на баку РФ у складзе незаконных узброеных фарміраванняў на Данбасе. Мужчына, вядомы пад пазыўнымі «Леў» і «Рафік», быў затрыманы летам 2024 года ў Данецкай вобласці і ўтрымліваўся ў следчым ізалятары ў Львове. Пра гэта паведамляе Нацыянальная паліцыя Украіны.

Паводле даных следства, 45‑гадовы ўраджэнец горада Аджыкабула (Азербайджан), які раней працаваў настаўнікам англійскай мовы, у кастрычніку 2023 года падпісаў кантракт з Узброенымі сіламі РФ тэрмінам на два гады і быў накіраваны ў падраздзяленне так званай «ДНР» — 1‑ю Славянскую брыгаду. Там ён служыў памочнікам гранатамётчыка ў штурмавой роце і ўдзельнічаў у баявых дзеяннях супраць украінскіх сіл. Нягледзячы на адсутнасць вайсковага досведу, наёмнік браў непасрэдны ўдзел у баях на Данбасе.

ЗСУ ўзялі яго ў палон 21 чэрвеня 2024 года каля населенага пункта Ачарэтына. Па запыце Генеральнай пракуратуры Азербайджана ўкраінскія праваахоўнікі правялі працэсуальныя дзеянні і пацвердзілі яго ўдзел у незаконных узброеных фарміраваннях. Паводле інфармацыі Службы дзяржаўнай бяспекі Азербайджана, мужчыну прад'яўлена падазрэнне ў стварэнні і ўдзеле ў узброеных групоўках, іх фінансаванні і забеспячэнні, яму пагражае да 15 гадоў пазбаўлення волі.