Сілы абароны Украіны адкінулі расіян у Харкаўскай вобласці

• 6.04.2026, 9:58

Аднаўлены кантроль паблізу Амбарнага.

Украінскія вайскоўцы адкінулі расійскія акупацыйныя сілы на поўнач ад вёскі Амбарнага, каля дзяржаўнай мяжы ў Купянскім раёне Харкаўскай вобласці.

Пра гэта паведамляе аналітычная платформа DeepState ў Telegram.

«Сілы абароны Украіны аднавілі кантроль паблізу Амбарнага», — гаворыцца ў паведамленні.

Паводле інфармацыі DeepState, украінскія байцы прасунуліся больш чым на 3 км у напрамку мяжы і вярнулі кантроль над лясным масівам паўночней ад вёскі Амбарнага ў Вялікабурлуцкай грамадзе.

Адзначаецца, што паспяховую аперацыю па знішчэнні праціўніка ў лясах паблізу Амбарнага і па зачыстцы тэрыторыі правялі падраздзяленні 129-й асобнай цяжкай механізаванай брыгады.

Акрамя таго, украінскім абаронцам удалося спыніць прасоўванне расійскіх сіл у напрамку ад вёскі Мелавае да вёскі Хатняе ў раёне Амбарнага.