У РФ прыкладанні буйных інтэрнэт-сэрвісаў абавязалі шукаць VPN на смартфонах карыстальнікаў

• 6.04.2026, 10:22

Найбуйнейшым ІТ-кампаніям разаслалі метадычку.

Мінліч разаслала найбуйнейшым ІТ-кампаніям метадычку па выяўленні VPN-сэрвісаў на прыладах расіян. Як вынікае з дакумента, з копіяй якога азнаёміўся РБК, для гэтага яны павінны выкарыстоўваць уласныя прыкладанні, усталяваныя на гаджэтах, і вызначаць IP-адрасы прылад, параўноўваючы іх з тымі, што лічацца расійскімі, а таксама са спісам, заблакаваным Раскамнаглядам. Метадычку атрымалі больш за 20 кампаній, у тым ліку Сбер, «Яндэкс», VK, Wildberries, Ozon, Avito, X5 і інш., піша The Moscow Times.

Мяркуецца, што арганізацыі пачнуць выяўляць VPN на гаджэтах пад кіраваннем аперацыйных сістэм Android, iOS, Windows, macOS і інш. Пры выяўленні такіх сэрвісаў кампаніі павінны будуць блакаваць іх працу. У той жа час у метадычцы Мінліч адзначаецца, што вызначыць, ці працуе VPN на прыладах ад Apple, складана, бо «ў iOS доступ да сістэмных параметраў істотна абмежаваны». У прыватнасці, палітыка канфідэнцыйнасці і бяспекі прадугледжвае, што ўсе староннія прыкладанні ізаляваныя і не могуць збіраць або змяняць інфармацыю, якая захоўваецца ў іншых прыкладаннях. У выпадку з Android сістэмы ConnectivityManager і NetworkCapabilities дазваляюць любому прыкладанню запытаць параметры актыўнай сеткі і паведаміць, што бягучы інтэрнэт-трафік ідзе праз VPN.

У сувязі з гэтым у Мінліч прапанавалі спачатку ўкараняць механізмы пошуку VPN на мабільных прыладах пад кіраваннем Android. «Укараненне праверак на прыладах пад кіраваннем іншых АС варта аднесці да наступных, больш позніх этапаў», — гаворыцца ў метадычцы. Акрамя таго, у Мінліч бачаць складанасці з выяўленнем VPN на маршрутызатарах, у віртуальных машынах, праксі-серверах, сетках дастаўкі кантэнту (CDN) і пры раздзельным тунэляванні. Таксама ведамства прызнала праблемы з выяўленнем новых VPN-сэрвісаў, бо яны з’яўляюцца хутчэй, чым абнаўляюцца рэпутацыйныя базы IP-адрасоў.

У Мінліч таксама рэкамендавалі не праводзіць на прыладзе карыстальніка бесперапынны маніторынг стану VPN, бо «гэта будзе негатыўна ўплываць на расход трафіку і спажыванне зараду батарэі». Адначасова ў метадычцы гаворыцца пра фарміраванне белага спісу карпаратыўных VPN і праксі-сервераў, якія будуць выкарыстоўвацца для бяспечнага доступу супрацоўнікаў да працоўных рэсурсаў з дома.

Мінліч пачало прымаць меры па барацьбе са сродкамі абыходу блакіровак напрыканцы сакавіка. Спачатку яно прадпісала «вялікай чацвёрцы» мабільных аператараў заблакаваць папаўненне Apple ID з рахунку мабільнага тэлефона, каб перашкаджаць аплаце VPN. Гэта было зроблена 1 красавіка. Таксама аператараў заклікалі ўсталяваць ліміт бясплатнага трафіку ў 15 гігабайт у месяц пры выкарыстанні VPN. Крыніцы Forbes паведамлялі, што абмежаваць сэрвісы для абыходу блакіровак у Расіі запатрабаваў Пуцін у «закрытым даручэнні». У Крамлі заяўлялі, што нічога не ведаюць пра такі дакумент.