Улады Расіі пацвердзілі гібель генерал-лейтэнанта Атрошчанкі

• 6.04.2026, 11:31

Ён быў на борце Ан-26, які разбіўся.

Губернатар Мурманскай вобласці Расіі Андрэй Чыбіс пацвердзіў гібель генерал-лейтэнанта Аляксандра Атрошчанкі падчас крушэння ваенна-транспартнага самалёта Ан-26 у анексаваным Крыме. Пра гэта Чыбіс паведаміў падчас нарады ўрада, якая пачалася з хвіліны маўчання, піша «Інтэрфакс».

Ан-26 разбіўся 31 сакавіка падчас планавога пералёту. На борце, паводле даных Мінабароны, знаходзіліся 29 чалавек. Следчы камітэт паведамляў пра 30 загінулых. Мінабароны ўдакладніла, што «паражальнага ўздзеяння па самалёце не было». Расійскія СМІ са спасылкай на неназваныя крыніцы пісалі, што самалёт урэзаўся ў скалу.

Пра тое, што падчас авіякатастрофы загінуў Аляксандр Атрошчанка, 2 красавіка паведамілі Руская служба «Бі-бі-сі» са спасылкай на крыніцу з ліку вайскоўцаў Паўночнага флоту і жыхарку Севераморска, якая страціла сваяка пры крушэнні, а таксама тэлеграм-канал «Дасье шпіёна». Паводле звестак каналу, разам з ім загінулі шэсць афіцэраў штаба Паўночнага флоту — вайсковай часці №45625 у Севераморску.

Атрошчанка ўзначальваў змешаны авіяцыйны корпус Паўночнага флоту з 2024 года. Да гэтага ён камандаваў марской авіяцыяй Чорнаморскага і Паўночнага флоту, а таксама 45-й арміяй ВПС і СПА Паўночнага флоту. У 2019 годзе яму прысвоілі званне генерал-лейтэнанта.