Іран кінуў яшчэ аднаго саюзніка

• 6.04.2026, 13:34

Пхеньян дыстанцыяваўся ад рэжыму аятолаў.

Паўночная Карэя, верагодна, імкнецца дыстанцыявацца ад Ірана, нягледзячы на традыцыйна цесныя адносіны паміж краінамі. Пра гэта паведамляе CNN са спасылкай на паўднёвакарэйскую выведку.

Паводле слоў дэпутата Пак Сон Вона, Нацыянальная выведвальная служба Паўднёвай Карэі лічыць, што КНДР дагэтуль не пастаўляла Ірану зброю або звязаныя з ёй матэрыялы.

Аб спробах захаваць дыстанцыю сведчаць і іншыя факты. У прыватнасці, Пхеньян не выказаў спачування пасля забойства былога вярхоўнага лідара Ірана аяталы Алі Хаменеі, а таксама не павіншаваў Маджтабу Хаменеі з прызначэннем на пасаду новага кіраўніка краіны.

На думку Пак Сон Вона, такая лінія паводзінаў можа быць спробай «забяспечыць новую дыпламатычную прастору» напярэдадні магчымога саміту паміж прэзідэнтам ЗША Дональдам Трампам і старшынём КНР Сі Цзіньпінам, які чакаецца ў маі.

Іншы паўднёвакарэйскі дэпутат, Лі Сонквон, адзначыў, што КНДР таксама ўнікае прамой крытыкі Дональда Трампа напярэдадні гэтай сустрэчы.