СМІ: Мельнікава, якая знікла з $150 тысячамі, набыла дзве кватэры ў Мінску
- 6.04.2026, 18:09
Таксама з кватэры экс-спікеркі КС знялі арышт.
Спікерка «Каардынацыйнага савета» Анжаліка Мельнікава, якая жыла ў Польшчы і каля года таму знікла са 150 тысячамі еўра, здзейсніла некалькі здзелак з нерухомасцю ў Мінску. Пра гэта паведамляе «Зеркало».
З дакументаў, якія атрымала рэдакцыя, вынікае, што праз паўгода пасля знікнення — у верасні 2025 года — Анжаліка стала ўласніцай аднапакаёвай кватэры ў Мінску. Жыллё знаходзіцца на праспекце Любімава, яго плошча складае 33,8 квадратнага метра.
Цэны на падобныя кватэры ў гэтым раёне — ад 208 тысяч рублёў (каля 71 тысячы долараў) да 240 тысяч рублёў (82 тысячы долараў).
Пазней, у студзені 2026 года, экс-спікерка КС набыла і аформіла на сябе яшчэ адну кватэру на вуліцы Пятра Мсціслаўца ў ЖК «Маяк Мінска» ў мікрараёне Усход. Паводле дакументаў, у ёй таксама адзін пакой, плошча — неверагодныя, як для аднапакаёўкі, 91,8 квадратнага метра.
Такі ж метраж, як у новай кватэры Анжалікі, — у чатырохпакаёвай кватэры ў гэтым комплексе, якую цяпер прадаюць за 1,1 мільёна рублёў (400 тысяч долараў). За «трэшку» меншага метражу ў «Маяку» просяць 643 тысячы рублёў (219 тысяч долараў), прасторная «двушка» выстаўлена на продаж за 572 тысячы рублёў (195 тысяч долараў).
Яшчэ адной кватэрай у сталіцы Мельнікава з 2016 года валодала сумесна з мужам і была ў ёй прапісаная.
Паводле інфармацыі крыніцы выдання, у маі 2024 года на гэту кватэру быў накладзены арышт.
Аднак, як стала вядома журналістам, у лютым 2026 года арышт знялі пастановай таго ж СК. Праз месяц кватэра перайшла ў аднаасобную ўласнасць Мельнікавай. Падставай для гэтага стала пагадненне аб падзеле сумеснай маёмасці сужэнцаў. Звычайна падставай для афіцыйнага падзелу маёмасці становіцца развод.
Нагадаем, спікерка Анжаліка Мельнікава знікла разам з выдзеленымі на працу «Каардынацыйнага савета» 150 тысячамі еўра 25 сакавіка 2025 года. Затым журналісты-расследавальнікі паведамілі пра яе кантакты з агентамі беларускай разведкі і паездкі на Кубу, Шры-Ланку і ў ААЭ. «Наша Ніва» называла Анжаліку Мельнікаву «чалавекам Паўла Латушкі на чале «Каардынацыйнага савета».