У ЗША стварылі элементы, дзякуючы якім робаты могуць падымаць вагу, што ў 100 разоў перавышае ўласную
- 6.04.2026, 22:04
На аснове паветра.
Амерыканскія навукоўцы распрацавалі штучныя мышцы на аснове паветра, якія дазваляюць робатам падымаць вагу, у 100 разоў большую за ўласную, без цяжкіх рухавікоў і знешніх крыніц сілкавання.
Даследаванне апублікавалі ў часопісе Proceedings of the National Academy of Sciences.
Распрацоўку ўзначаліў аспірант Універсітэта штата Арызона Эрык Вайсман. Яго каманда стварыла мышцы, што імітуюць працу сапраўдных — яны скарачаюцца і расцягваюцца, як у жывых арганізмаў. Такія мышцы лягчэйшыя, больш гнуткія і мацнейшыя за папярэднія аналагі.
Новыя прывады выглядаюць як невялікія трубкі, закручаныя ў спіраль, падобна да макарон. Для іх працы патрабуецца невялікая колькасць паветра, якое прымушае іх сціскацца і пашырацца. Дзякуючы гэтаму ўдалося стварыць робатаў, якія могуць рухацца самастойна без знешняга сілкавання і насіць усё неабходнае з сабой.
У адрозненне ад звычайных робатаў з рухавікамі, якія часта цяжкія і менш мабільныя, гэтыя мышцы робяць машыны больш гнуткімі і амаль бясшумнымі. Яны таксама могуць працаваць у складаных умовах, у прыватнасці ў гарачым асяроддзі або сярод абразіўных матэрыялаў, і пераадольваць перашкоды.
Распрацоўшчыкі кажуць, што такіх робатаў змогуць выкарыстоўваць падчас выратавальных аперацый — напрыклад, для пошуку людзей пад заваламі. Дзякуючы гнуткасці яны здольныя пранікаць у вузкія прасторы, не пашкоджваючы іх. Таксама іх можна выкарыстоўваць дома для дапамогі пажылым людзям у штодзённых справах.
Акрамя таго, тэхналогія падыходзіць для сельскай гаспадаркі, прамысловасці і медыцыны. Навукоўцы ўжо стварылі рабатызаваную руку, якая працуе па прынцыпе хобата слана і можа лёгка абмінаць перашкоды, а таксама насімую прыладу для падтрымкі спіны, якая змяншае нагрузку пры падняцці цяжараў.
Паводле слоў аднаго з аўтараў даследавання Цзіфэна Суна, такія мышцы можна выкарыстоўваць нават у космасе — як у прыладах для астранаўтаў, так і ў робатах для касмічных місій.