Экіпаж місіі «Артэміс-2» абляцеў Месяц

• 7.04.2026, 7:49

Місія вяртаецца на Зямлю.

Астранаўты місіі «Артэміс-2» у панядзелак аддаліліся ад Зямлі на максімальную адлегласць за ўсю гісторыю асваення космасу і праляцелі над адваротным бокам Месяца, разглядаючы яго паверхню ў дэталях, паведамляе BBC.

«Экіпаж місіі «Артэміс-2» у складзе астранаўтаў НАСА Рыда Уайзмена, Віктара Гловера і Крысціны Кох, а таксама астранаўта Канадскага касмічнага агенцтва Джэрэмі Хансэна усталяваў рэкорд па адлегласці ад Зямлі, пройдзенай падчас пілотаванай місіі, перасягнуўшы рэкорд «Апалона-13», усталяваны ў 1970 годзе (248 655 міль)», — паведамілі ў НАСА.

Экіпаж «Апалона-13» аддаліўся ад Зямлі на 400 171 км. «Артэміс-2» пабіла гэты рэкорд прыблізна на 6,5 тысячы км, дасягнуўшы максімальнага аддалення ад Зямлі ў 252 756 міль (406 771 кіламетр), паведамілі ў НАСА.

Пасля 22:00 па Грынвічу Цэнтр кіравання палётамі ў Х'юстане страціў сувязь з экіпажам, калі касмічны карабель «Арыён» апынуўся за адваротным бокам Месяца. Гэтая паўза працягнулася роўна 40 хвілін, як і было разлічана.

Спачатку на маніторы інжынераў вярнуўся радыёсігнал, затым паступіў вялікі пакет дадзеных, а пасля прагучаў выразны голас Крысціны Кох: «Х'юстан, «Інтэгрыці», праверка сувязі. Так прыемна зноў чуць Зямлю».

Падчас пралёту над адваротным бокам карабель знаходзіўся на мінімальнай адлегласці ад паверхні Месяца — 6550 км. З такой адлегласці астранаўты маглі ўважліва разгледзець гэтую частку месяцовай паверхні і правесці дэталёвую фотаздымку. Іх таксама папрасілі зрабіць малюнкі алоўкам і аўдыёзапісы з апісаннем таго, што яны бачаць.

Цяпер астранаўты вяртаюцца на Зямлю. На зваротным шляху яны таксама назіралі сонечнае зацьменне і вялі яго фота- і відэаздымку.