З якога боку нападуць на Лукашэнку
- Тэлеграм-канал «Лісты да дачкі»
- 7.04.2026, 10:47
Раней нехта верыў, што Пуцін яго абароніць, а цяпер наадварот.
Учора гарант, у якога сканчаецца тэрмін, сказаў, што калі амерыканцы не справіліся з Іранам, дык і з Кітаем яны таксама не справяцца. Значыць, Кітай амерыканцам не па зубах. А тое, што з Расіяй амерыканцы не справяцца, нехта, звярні ўвагу, не сказаў.
Не знайшлося там у яго месца для згадкі пра Расію. То-бок паводле сучасных гарантаўскіх уяўленняў пра навакольную рэчаіснасць, саюзнік і галоўны гарант яго стабільнасці, аказваецца, амерыканцам па зубах.
І гэта, лічу, шмат што тлумачыць у гарантаўскіх геапалітычных манеўрах апошняга часу. Ну, бо пакуль нехта лічыў, што Расія ўсё роўна пераможа або што Расія хаця б не можа прайграць, ён сабе ніякіх манеўраў не дазваляў.
А цяпер атрымліваецца, што непераможным застаўся толькі Кітай. Але не факт, што нават друг Пуцін пайшоў бы абараняць некага. А таварыш Сі абараняць некага ў такую далячыню дакладна не пойдзе.
То-бок атрымліваецца, што некаму застаецца спадзявацца толькі на баегатоўнасць сваіх генералаў. А больш, аказваецца, спадзявацца няма на каго. А баегатоўнасць сваіх генералаў нехта нядаўна бачыў. І яна яму дакладна не спадабалася.
Якая там баегатоўнасць? Тыя генералы нават не могуць паказаць на карце, адкуль на іх гаранта рыхтуецца напад.
Тым больш што пытанне пра тое, як амерыканцы спраўляюцца ў Іране, пытанне спрэчнае і, я б сказаў, вельмі неадназначнае. Маю на ўвазе, што з Іранам яны, вядома, пакуль яшчэ не справіліся, але з гуманістам Хаменеі справіліся цалкам. І з многімі іншымі іранскімі гуманістамі таксама.
А нехта, у адрозненне ад Хаменеі, у пакутнікі загадзя не запісваўся. І што там будзе з яго стабільнасцю, калі ў ёй не будзе яе гаранта, гаранту, у якога сканчаецца тэрмін, падазраю, абсалютна не цікава. Як там яго баявыя генералы потым за яго адпомсцяць, некага не суцяшае.
Тым больш што сведкі стабільнасці, у адрозненне ад іранскіх гуманістаў, у пакутнікі таксама не запісваліся. З усіх сведкаў стабільнасці ў пакутнікі запішацца адзін божы чалавек Азаронак. Але нават гэта не дакладна.
Зразумей мяне правільна. Я асабіста трохі сумняваюся, што на гаранта, у якога сканчаецца тэрмін, рыхтуецца напад. Але гарант, у якога сканчаецца тэрмін, у адрозненне ад мяне і сваіх генералаў, здаецца, у гэтым амаль не сумняваецца.
Ён толькі дакладна не ведае, з якога боку будуць нападаць. Але раней нехта верыў, што Пуцін яго абароніць, а цяпер наадварот. Цяпер ці то яму ўжо трэба абараняць Пуціна, ці то абараняцца ад Пуціна.
І, дарэчы, адразу не скажаш, які з гэтых варыянтаў горшы. Бо ніводзін не радуе.
Тэлеграм-канал «Лісты да дачкі»