Беларус купіў BMW і не здолеў паставіць на ўлік

• 7.04.2026, 13:19

Аўтамабіль апынуўся ў вышуку.

Беларус купіў BMW X6 2020 года выпуску. Калі ён паспрабаваў паставіць машыну на ўлік у ДАІ, у супрацоўнікаў узніклі сумненні ў сапраўднасці VIN-нумара і пасведчання аб рэгістрацыі. Была прызначаная экспертыза.

Пры праверцы высветлілася, што ідэнтыфікацыйны нумар аўтамабіля сапраўдны і не змяняўся, а вось дакументы аказаліся падробленымі. Дзяржаўны камітэт судовых экспертыз (ДКСЭ) паведамляе, што бланк пасведчання аб рэгістрацыі быў выраблены не на афіцыйным прадпрыемстве, а ахоўныя элементы на ім імітаваныя. Пазней высветлілася, што гэты аўтамабіль лічыцца ў вышуку ў Расіі.

Мужчына распавёў, што купіў машыну ў знаёмага ў РФ і не ведаў, што яна знаходзіцца ў вышуку. Па дадзеным факце праводзіцца праверка.