Беларуска расказала, колькі каштуе пракарміць сям'ю за месяц
- 7.04.2026, 18:27
Сума здзівіла каментатараў.
Беларуска з Полацка расказала ў TikTok, колькі яе сям'я патраціла за месяц на прадукты, кафэ і асноўныя тавары для дома — кшталту бытавой хіміі. Паводле яе падлікаў, агульная сума выдаткаў склала 1 522,72 рубля. У каментарах пад відэа разгарнулася дыскусія: адны назвалі такія траты занадта вялікімі, іншыя — даволі сціплымі для сям'і з дзіцем.
Аўтарка роліка ўдакладніла, што ў сям'і тры чалавекі і прадукты яны купляюць у краме «Хіт», піша «Зеркало».
На садавіну за месяц у іх пайшло 37,4 рубля. На гародніну — 61,27 рубля. «Мы пачалі купляць бульбу, таму і падцягнулася», — пракаментавала аўтарка роліка.
Малочныя прадукты пацягнулі 132,84 рубля. Найбольшы артыкул выдаткаў — мяса і рыба — 361,86 рубля. «З рыбы мы бяром толькі мінтай, але можам яшчэ ўзяць чырвоную рыбу», — кажа палачанка.
Хлебабулачныя вырабы — 57,20 рубля. Розныя тавары для дзіцяці — паучы, кашы, мясныя кансервы, вада, падгузнікі — 206,73 рубля.
«Яшчэ мы п'ём пакупную ваду, а таксама я бяру сок, часам ліманады. На гэта сышло 113,37 рубля за месяц. На макароны і крупы за месяц сышло 8,77 рубля. Але ў нас з папярэдніх месяцаў яшчэ шмат засталося», — расказала аўтарка роліка.
«Паходы ў кафэ я таксама ўключыла ў гэты падлік, бо гэта таксама ежа. І за месяц мы былі прыкладна пяць-шэсць разоў у ўстановах, атрымалася сума 196,32 рубля. І на ўсякае рознае астатняе ў краме: і прадукты, і бытавую хімію, парашок… Увогуле атрымалася сума 347 рублёў 23 капейкі», — працягнула беларуска.
Усяго траты дасягнулі 1 522,72 рубля.
Некаторых каментатараў сума здзівіла, але з розных прычын: для адных яна аказалася вялікай, для іншых — сціплай. «Хоць хтосьці рэальную суму напісаў. А то пішуць: “Ой, у мяне 700 рублёў за месяц сышло”. Вы там што, на «Дошыраку» сядзіце і ікру ясьце? Адзін паход у краму — 100 рублёў сыходзіць», — напісалі ў каментарыях. Аўтарка роліка пагадзілася: «Вось-вось. Я не ўяўляю, як на 700. Цэлы месяц есці адны крупы, бульбу і кавалак мяса. Ды ў мяне сілы волі не хопіць не зрывацца на прысмакі. Ды і дзіця яшчэ ў нечым абмяжоўваць таксама нерэальна».
Хтосьці прызнаўся, што яго сям'я з трох чалавек траціць 770 рублёў — «таксама купляем ваду». На што жанчына адказала: «Вельмі эканамна ў вас атрымліваецца. Я таксама хачу паспрабаваць скараціць траты, больш рацыянальна нешта купляць».
Вось якія яшчэ каментары пакінулі пад відэа:
«На садавіну 37 рублёў — вельмі мала. Нас трое: дзіця 13 гадоў і двое дарослых, на садавіну 200 рублёў мінімум».
«У нас 1 555,42 рубля на ежу і бытавыя тавары, не лічачы кафэ. Але я ў гэтым месяцы круп і хіміі, паперы і г.д. на два месяцы наперад накупіла».
«У нас сям'я з пяці чалавек, дзеці яшчэ маленькія, толькі на ежу прыкладна сыходзіць каля 2 тысяч. Гэта на самае базавае. Ролы і піцу мы не ямо».
«У мяне сям'я з чатырох чалавек, і мы малаежкі. За месяц мы трацім не менш за 1300 рублёў на ежу».
«На садавіну 37 рублёў у мяне сыходзіць у дзень на мяне адну».
«У каго такога заробку няма. Вы шыкуеце».
«Навучыце, як так эканамна. Тут у тры тысячы ледзь укладваешся, і чорнай ікры не ямо».