Цыклон «Рапунцэль» лютуе ў Беларусі

• 7.04.2026, 18:46

Што нарабіла непагадзь.

На гэтым тыдні Беларусь апынулася ва ўладзе цыклона «Рапунцэль». Ён прынёс няўстойлівае надвор'е: з парывістым ветрам, ападкамі і рэзкім пахаладаннем. У некаторых раёнах фіксавалі нават град.

Пры гэтым «пабочкі» непагоды ўжо адчуваюцца па ўсёй краіне. Ратавальнікі былі вымушаныя аператыўна ліквідоўваць наступствы разбушаванай стыхіі ў некалькіх рэгіёнах, паведамілі ў МНС.

Працы вяліся адразу ў чатырох абласцях: Віцебскай, Брэсцкай, Мінскай і Гродзенскай. Там супрацоўнікі МНС прыбіралі паваленыя дрэвы, якія перакрывалі праезную частку.

Былі і больш сур'ёзныя інцыдэнты.

У Гродне моцны парыў ветру сарваў металічны ліст з парапета гандлёвага цэнтра. Канструкцыю давялося дэмантаваць ратавальнікам.

Падобная сітуацыя адбылася ў Брэсце. Там спатрэбілася дапамога ў прыбіранні рэкламнага шчыта і элементаў даху.

На шчасце, паводле аператыўнай інфармацыі, ва ўсіх выпадках абышлося без пацярпелых.