«Вораг павінен быць знішчаны»: у Акадэміі навук звярнуліся да беларусаў

• 8.04.2026, 12:46

Навукоўцы заклікалі без абмежаванняў вылаўліваць тры небяспечныя віды рыб.

У Акадэміі навук заклікалі беларусаў бязлітасна вылаўліваць тры віды рыб, якія лічацца сапраўднымі ворагамі мясцовай фаўны. Гэтыя віды ўнесеныя ў антыпод Чырвонай кнігі — у «Чорную кнігу інвазійных відаў жывёл Беларусі», піша Telegraf.news.

Ідзе пра тры агрэсіўныя інвазійныя віды рыб:

амерыканскі сомік,

ратан-галавешка,

бычак-пясочнік.

Для беларускіх вадаёмаў усе яны — чужародныя. У буйных рэках шчупак або акунь яшчэ могуць хоць неяк рэгуляваць іх папуляцыю, паядаючы маладзь гэтых рыб, але трапляючы ў невялікія стаўкі або азёры, дзе ў гэтых відаў амаль няма натуральных ворагаў, яны пачынаюць выцясняць абарыгенныя віды, маючы значную перавагу ў канкурэнцыі за корм і знішчаючы маладзь мясцовых відаў рыб.

Каб хоць неяк запаволіць працэс распаўсюджвання гэтых надзвычай жывучых відаў, якія хутка размнажаюцца, у Беларусі гэтую рыбу дазваляецца лавіць без усялякіх абмежаванняў па вазе і колькасці. Больш за тое, загадчыца лабараторыі іхтыялогіі Навукова-практычнага цэнтра Нацыянальнай акадэміі навук Беларусі па біярэсурсах Алена Гайдучэнка нядаўна заклікала рыбакоў яшчэ актыўней уключыцца ў барацьбу з «варожымі» відамі.

«Вораг павінен быць знішчаны. Трэба разумець, што гэтыя тры віды — гэта не проста рыбы. Гэта рыбы, якія шкодзяць і наносяць істотную шкоду іхтыяцэнозу і воднаму насельніцтву. Таму, калі бачыце — забірайце, лаўце іх. Такім чынам мы ўсе разам будзем дапамагаць прыродзе», — звярнулася да беларускіх рыбакоў Гайдучэнка.

Спецыялістка асабліва падкрэсліла, што гэтыя тры віды рыб «ні ў якім разе нельга расселяць і пераносіць у новыя месцы пражывання», каб не пагоршыць сітуацыю з інвазійнымі захопнікамі беларускіх вадаёмаў.