У Беларусі ўводзяць абмежаванні на імпарт акумулятараў

• 8.04.2026, 17:31

Улады разлічваюць, што аўтаўладальнікі будуць набываць айчынную прадукцыю.

У Беларусі ўводзіцца ліцэнзаванне імпарту акумулятараў. Адпаведную пастанову падпісаў прэм’ер-міністр Аляксандр Турчын, паведамляе прэс-служба беларускага ўрада.

Дакумент прадугледжвае ў аднабаковым парадку ўвядзенне часовай меры нетарыфнага рэгулявання, якая абмяжоўвае ўвоз у Беларусь на тэрмін 6 месяцаў акумулятарных батарэй (АКБ) шляхам выдачы ліцэнзій на ўвоз.

Ліцэнзаванне імпарту АКБ прадугледжваецца ў дачыненні да наступных тыпаў тавараў:

8507 10 200 2 – акумулятары электрычныя, свінцовыя, якія выкарыстоўваюцца для запуску поршневых рухавікоў, з вадкім электралітам, масай больш за 5 кг, для прамысловай зборкі;

8507 10 200 3 – акумулятары электрычныя, свінцовыя, з вадкім электралітам, іншыя, масай больш за 5 кг.

Таксама ўдакладняецца, што ліцэнзаванне на ўвоз АКБ не будзе распаўсюджвацца на тавары, што паходзяць з дзяржаў – членаў ЕАЭС, пры ўмове пацвярджэння іх паходжання сертыфікатам аб паходжанні тавару формы СТ-1 або сертыфікатам аб паходжанні тавару іншай формы, альбо ўключаныя ў Еўразійскі рэестр прамысловых тавараў дзяржаў – членаў ЕАЭС.

У Савміне запэўнілі, што такая мера не прывядзе да павышэння цэн для спажыўца. Яна была прынята дзеля падтрымкі айчынных вытворцаў.