У Мінску ўдвая скарацяць будаўніцтва жылля

• 8.04.2026, 19:48

Па даручэнні Лукашэнкі.

З 2026 года ў Мінску будуць уводзіць у эксплуатацыю не больш за 300 тысяч квадратных метраў жылля ў год — больш як у два разы менш, чым будавалі летась. Пра гэта ў інтэрв’ю часопісу «Эканоміка Беларусі» паведаміў першы намеснік старшыні Мінскага гарвыканкама Аляксандр Камендант, перадае БелТА.

З 2026 года ў Мінску будуць будаваць не больш за 300 тыс. кв. м жылля ў год. Такое абмежаванне ўводзіцца па даручэнні Аляксандра Лукашэнкі, паведаміў Аляксандр Камендант.

Для параўнання: у 2025 годзе ў Мінску ўвялі ў эксплуатацыю 719,9 тыс. кв. м жылля — 101,4% ад гадавога задання. Яшчэ 14,7 тыс. кв. м увялі ў пасёлку Сонечным Мінскага раёна, 18,9 тыс. кв. м — у Смалявічах.

Як вынікае са слоў чыноўніка, прыярытэт у будаўніцтве аддадуць тым, хто стаіць у чарзе на паляпшэнне жыллёвых умоў, найперш шматдзетным сем’ям і вайскоўцам.

У 2025 годзе для тых, хто мае патрэбу, у Мінску ўвялі 147,3 тыс. кв. м жылля. З іх 112,1 тыс. кв. м — з дзяржаўнай падтрымкай, 43,6 тыс. кв. м прызначаліся для вайскоўцаў, а яшчэ 64,2 тыс. кв. м склала арэнднае жыллё з улікам дамоў, уведзеных у Сонечным і Смалявічах.

Паводле слоў Каменданта, у Мінску і побач са сталіцай будуць развіваць арэнднае жыллё і асвойваць новыя тэрыторыі пад забудову. У прыватнасці, працягваецца развіццё Смалявічаў як горада-спадарожніка.

Акрамя таго, пачынаецца маштабная забудова ў раёне Калодзішчаў і Зялёнага Бора. Побач з Калодзішчамі плануюць пабудаваць 1,2 млн кв. м жылля для прыкладна 46 тысяч чалавек, а ў Зялёным Бары — каля 4 млн кв. м прыблізна на 100 тысяч жыхароў.

Цяпер у Мінску на ўліку тых, хто мае патрэбу ў паляпшэнні жыллёвых умоў, знаходзіцца 171 813 сем’яў. З іх 2645 ужо паляпшаюць жыллёвыя ўмовы. Сярод шматдзетных сем’яў у чарзе знаходзяцца 3254, яшчэ 1215 ужо вырашаюць жыллёвае пытанне.