Беларускую рэкордсменку дыскваліфікавалі за допінг

• 9.04.2026, 16:30

У крыві Вікторыі Бартош знайшлі сальбутамол.

Лёгкаатлетку Вікторыю Бартош адхілілі ад спаборніцтваў за ўжыванне забароненых рэчываў, паведамляе Нацыянальнае антыдопінгавае агенцтва Беларусі.

У крыві спартсменкі выявілі сальбутамол. Гэта прэпарат, які выкарыстоўваюць галоўным чынам пры бранхіяльнай астме для тэрміновай дапамогі падчас прыступу кашлю і недахопу паветра.

Тэрмін адхілення пачаўся яшчэ 30 студзеня 2026-га. Вярнуцца ў спорт Вікторыя Бартош зможа не раней за 30 студзеня 2027 года.

Па каментар Onlíner (https://sport.onliner.by/2026/04/09/belorusskuyu-rekordsmenku-diskvalificirovali-za-doping) звярнуўся ў Беларускую федэрацыю лёгкай атлетыкі, аднак там адмовіліся каментаваць гэтую тэму.

Вікторыя Бартош — беларуская лёгкаатлетка, якая спецыялізуецца на спартыўнай хадзе. У 2025 годзе на чэмпіянаце Беларусі ў Магілёве яна ўсталявала новы нацыянальны рэкорд на дыстанцыі 10 000 метраў (43 хвіліны 13 секунд), перасягнула дасягненне, якое трымалася з 2008 года.