Вялікабрытанія рыхтуецца да атакаў РФ на падводную інфраструктуру

• 9.04.2026, 16:42

Разгорнутыя ўзброеныя сілы.

Вялікабрытанія заявіла пра выяўленне расійскай актыўнасці ў сваіх водах і прымае меры для прадухілення атак расійскіх падводных лодак на кабелі і трубаправоды, піша Reuters.

Міністр абароны Джон Гілі расказаў, што краіна разгарнула свае ўзброеныя сілы, каб прадухіліць магчымыя атакі на кабелі і трубаправоды, калі расійскія падводныя лодкі знаходзіліся ў брытанскіх водах.

Ён удакладніў, што гаворка ідзе пра сітуацыю, якая мела месца гэтай зімой. Міністр паведаміў, што брытанскія сілы і саюзнікі, уключаючы Нарвегію, адсочвалі і стрымлівалі дзейнасць расійскага флоту.

Гілі адзначыў, што абнародуе гэтую аперацыю, «каб Уладзімір Пуцін ведаў, што іх заўважылі».

Паводле яго слоў, цяпер падводныя лодкі ўжо пакінулі брытанскія воды і накіраваліся на поўнач, і няма ніякіх прыкмет пашкоджання падводнай інфраструктуры.

«Я кажу: „Мы вас бачым. Мы бачым вашу актыўнасць над нашымі кабелямі і трубаправодамі, і вы мусіце ведаць, што любая спроба іх пашкодзіць будзе мець сур'ёзныя наступствы“,» — папярэдзіў Гілі.

Брытанскі міністр падкрэсліў, што перамяшчэнні расійскіх суднаў не былі сакрэтнымі, як планаваў расійскі дыктатар Уладзімір Пуцін, спроба сакрэтнай аперацыі была раскрыта.

Ён дадаў, што расійская аперацыя ўключала падводную лодку класа «Акула» і дзве спецыялізаваныя падводныя лодкі з расійскага Галоўнага ўпраўлення глыбакаводных даследаванняў.