Экіпаж Artemis II правёў прэс-канферэнцыю ў космасе

• 9.04.2026, 17:31

І расказаў пра 40 хвілін «глыбокай адзіноты».

Чатыры астранаўты на борце касмічнага карабля «Арыён» выканалі сваю місію, абляцеўшы вакол Месяца, і, як чакаецца, прыводняцца ля ўзбярэжжа Сан-Дыега каля поўначы па Грынвічу ў пятніцу (3.00 па Мінску), перадае BBC.

У сераду астранаўты місіі «Артэміс-2» правялі прэс-канферэнцыю ў космасе. Гэта была першая магчымасць пагаварыць з камандай пасля аблёту Месяца, падчас якога астранаўты аддаліліся ад Зямлі на рэкордную адлегласць.

У размове з журналістамі пілот місіі Віктар Гловер сказаў, што экіпаж з нецярплівасцю чакае магчымасці падзяліцца са светам тым, што яны ўбачылі: «Яшчэ столькі фотаздымкаў, столькі гісторый, і, О Божа, я яшчэ нават не пачаў усведамляць, праз што мы прайшлі. У нас яшчэ два дні наперадзе, і палёт на агняным шары праз атмасферу — гэта таксама незабыўнае ўражанне».

Падчас віртуальнай прэс-канферэнцыі ў Цэнтры касмічных палётаў імя Джонсона НАСА ў Х'юстане астранаўты зноў з'явіліся ў жывым эфіры, а мікрафон лунаў паміж імі.

Кожны з іх па чарзе адказваў на пытанні журналістаў, хоць і з заўважнай затрымкай.

Карэспандэнт Los Angeles Times спытаў экіпаж пра 40 хвілін «глыбокай адзіноты», калі яны страцілі сувязь з Зямлёй.

Камандзір Рэйд Уайзман сказаў, што ў экіпажа было шмат навуковай працы, і гэта былі «верагодна, самыя важныя назіранні Месяца для нашай геалагічнай каманды».

«Але мы ўчатырох прысвяцілі гэтаму хвілінку, паласаваліся печывам з кляновым сіропам, якое прывёз Джэрэмі, і патрацілі тры–чатыры хвіліны, проста як экіпаж, каб па-сапраўднаму ўсвядоміць, дзе мы знаходзімся», — сказаў ён.