Экспарт амерыканскай нафты ў красавіку дасягне рэкорднага ўзроўню

• 9.04.2026, 20:04

Прагноз кампаніі Kpler.

Эксперты даследчай кампаніі Kpler прагназуюць рост экспарту нафты з ЗША на траціну, да 5,2 млн барэляў у дзень, у параўнанні з сакавіцкім паказчыкам у 3,9 млн барэляў у дзень, паведамляе Financial Times. Аналітыкі патлумачылі, што такі прагноз звязаны са спробамі азіяцкіх спажыўцоў кампенсаваць страты сыравіны ў выніку вайны ў Персідскім заліве. У кампаніі Kpler лічаць, што попыт на нафту з боку азіяцкіх спажыўцоў вырасце ў красавіку на 82%, да 2,5 млн барэляў у дзень.

Паводле дадзеных кампаніі, у порты ЗША цяпер накіроўваюцца 68 танкераў. Для параўнання, цягам сямі дзён да удараў ЗША і Ізраіля па Іране ў ЗША ішлі 24 танкеры. У сярэднім у 2025 годзе за амерыканскай нафтай ішлі 27 танкераў на тыдзень.

Як адзначаюць эксперты, азіяцкія спажыўцы апынуліся ў найбольш уразлівым становішчы з-за канфлікту вакол Ірана: прыкладна 80% нафты і нафтапрадуктаў, што транспартавалася праз Армузскі праліў, накіроўвалася ў Кітай і суседнія з ім краіны.

Павелічэнне экспарту амерыканскай нафты ўжо прывяло да росту цэн на сыравіну, нагадваюць эксперты. На пачатку гэтага тыдня барэль нафты маркі WTI каштаваў $110, што стала самым высокім узроўнем за апошнія чатыры гады.