CNN: Расія церпіць рэпутацыйны ўдар у Афрыцы
- 10.05.2026, 19:38
Паражэнне ў Малі нанесла ўдар па прэстыжу Масквы.
Калі ў красавіку расійскія вайскоўцы былі вымушаныя адступіць з пазіцый у горадзе Кідаль на поўначы Малі, яны страцілі нешта большае, чым проста тэрыторыю.
Пра гэта паведаміў тэлеканал CNN у нядзелю, 10 мая.
Вывад так званага Афрыканскага корпуса Мінабароны РФ з горада Кідаль нанёс удар па прэстыжу Масквы, адзначылі назіральнікі, паколькі Расія імкнулася пазіцыянаваць сябе як вядучага «спонсара бяспекі» ў рэгіёне Сахель (які ўключае Сенегал, Маўрытанію, Малі, Буркіна-Фасо, Нігер, Нігерыю, Чад, Судан, Камерун і Гамбію).
Правал у Малі стаў яшчэ адным звяном у ланцугу непрыемных для Крамля падзей, калі Расія фактычна аказвалася няздольнай падтрымаць сваіх шматгадовых саюзнікаў — такіх, як Нікалас Мадура у Венесуэле або Башар Асад у Сірыі.
Кідаль на паўночным усходзе Малі быў захоплены малійскай арміяй і расійскімі наймітамі ў 2023 годзе. Той год наогул быў паспяховым для РФ — тады на саміце Расія—Афрыка кіраўнік Крамля Уладзімір Пуцін абвясціў пра заключэнне пактаў аб вайсковым супрацоўніцтве з больш чым 40 афрыканскімі краінамі.
Аднак ваенная прысутнасць Расіі ў Афрыцы яшчэ грунтавалася на групе «Вагнер», якая дзейнічала, у прыватнасці, у Лівіі, Мазамбіку і Цэнтральна-Афрыканскай Рэспубліцы.
Пазней група «Вагнер» ператварылася ў так званы Афрыканскі корпус, які ўжо не быў прыватнай вайсковай кампаніяй, а падпарадкоўваўся Міністэрству абароны Расіі. Захоп горада Кідаль у 2023-м называюць «адзінай перамогай расіян» за той перыяд. Астатнія амбіцыйныя планы ўплыву ў Афрыцы не былі выкананыя.
«Падзенне Кідаля і прыніжальнае, зафіксаванае на відэа адступленне расіян нанеслі велізарную шкоду рэпутацыі Масквы і яе амбіцыям у Афрыцы», — заявіў кіраўнік праграмы Сахеля нямецкага аналітычнага цэнтра Фонда Канрада Адэнаўэра Ульф Лесінг.
У той жа час аналітыкі папярэджваюць, што Расія і дагэтуль застаецца адзіным партнёрам, які гатовы непасрэдна разгортваць баявыя сілы на пярэдавой. А для малійскага рэжыму, які спрабуе змагацца з паўстанцамі, гэта крытычна важны фактар.
«У рэшце рэшт у Малі няма іншага выбару, акрамя як супрацоўнічаць з Расіяй», — падкрэсліў Лесінг.
27 красавіка так званы Афрыканскі корпус Мінабароны Расіі афіцыйна пацвердзіў выхад з горада Кідаль, што на паўночным усходзе Малі.
28 красавіка расійскае прапагандысцкае агенцтва ТАСС са спасылкай на заяву намесніка кіраўніка МЗС РФ Георгія Барысенкі паведаміла, што падчас баёў у Малі загінулі расійскія найміты, а тэхніка, пакінутая так званым Афрыканскім корпусам пры адступленні, была захопленая мясцовымі паўстанцамі.