Навукоўцы распавялі пра нечаканы эфект журавінавага соку

• 11.05.2026, 8:59

Эфект пакуль пацверджаны толькі ў лабараторных умовах.

Даследчыкі з Нацыянальнага інстытута навуковых даследаванняў выявілі, што журавінавы сок можа ўзмацняць дзеянне антыбіётыкаў пры інфекцыях мачавывадных шляхоў. Вынікі даследавання апублікаваныя ў часопісе Applied and Environmental Microbiology (AEM).

Навукоўцы вывучалі ўплыў журавінавага соку на урапатагенныя штамы кішачнай палачкі — бактэрыі, што выклікаюць большасць інфекцый мачавывадных шляхоў. У эксперыментах сок узмацняў дзеянне антыбіётыка фосфаміцыну ў 72% пратэставаных штамаў і адначасова зніжаў верагоднасць з'яўлення мутацый, звязаных з устойлівасцю да лячэння.

Па словах кіраўніка даследавання Эрыка Дэзіэля, эфект пакуль пацверджаны толькі ў лабараторных умовах. Даследчыкі пакуль не ведаюць, ці будуць актыўныя рэчывы з журавінавага соку ў дастатковай колькасці трапляць у агмені інфекцыі пасля ўжывання напою чалавекам.

Раней лічылася, што журавіны дапамагаюць пры інфекцыях мачавывадных шляхоў дзякуючы высокай кіслотнасці. Аднак пазнейшыя даследаванні паказалі, што асноўную ролю адыгрываюць рэчывы, якія змяшчаюцца ў ягадах і перашкаджаюць бактэрыям прымацоўвацца да клетак мачавывадных шляхоў.

Новае даследаванне паказала яшчэ адзін магчымы механізм, звязаны з антыбіётыкам фосфаміцынам. Прэпарат пранікае ў патагенныя бактэрыі праз каналы, па якіх яны паглынаюць цукры. Як высветлілі навукоўцы, рэчывы з журавінавага соку прымушаюць бактэрыі актыўней выкарыстоўваць адзін з такіх каналаў.

Аўтары адзначаюць, што ўстойлівасць да антыбіётыкаў часта развіваецца менавіта праз змены ў сістэмах транспарту рэчываў унутры бактэрыяльных клетак. Таму спалучэнне антыбіётыкаў з прыроднымі злучэннямі патэнцыйна можа павысіць эфектыўнасць лячэння.

Інфекцыі мачавывадных шляхоў штогод узнікаюць больш чым у 400 мільёнаў чалавек па ўсім свеце. Паводле некаторых ацэнак, хаця б раз у жыцці з імі сутыкаецца больш за палову жанчын. На фоне росту ўстойлівасці бактэрый да антыбіётыкаў навукоўцы ўсё актыўней шукаюць спосабы ўзмацніць дзеянне існуючых прэпаратаў.