Людзі без дыплома таксама ўмеюць добра працаваць

• 11.05.2026, 18:30

У сацыяльных сетках разгарэлася дыскусія.

У Баранавічах разгарэлася дыскусія пра тое, ці можна сёння ўладкавацца на працу без сярэдняй спецыяльнай або вышэйшай адукацыі. Прычынай стаў эмацыйны зварот мясцовай жыхаркі, якая паскардзілася: у горадзе амаль паўсюль патрабуюць дыплом — нават на пазіцыі, дзе, на яе думку, важнейшыя досвед і навыкі, піша BGMedia.

Жанчына распавяла, што раней працавала ў Мінску і без цяжкасцей знаходзіла вакансіі. Паводле яе слоў, у яе вялікі практычны досвед. Аднак у Баранавічах, кажа яна, нават на пазіцыю мерчандайзера патрабуюць профільную адукацыю.

«Работадаўцы, ужо не той час. Людзі без дыплома таксама ўмеюць добра працаваць», — заяўляе яна.

Жанчына падкрэслівае: яна разумее каштоўнасць адукацыі як паказчыка дысцыпліны, але перакананая — адказнасць і самаарганізацыя не залежаць ад «скарынкі».

Асобная бяда — аддаленая праца. Паводле яе слоў, у горадзе «нармальнай аддалёнкі няма».

Што пішуць у каментарыях: падтрымка і жорсткая крытыка

Гісторыя выклікала ажыўленую рэакцыю. Людзі падзяліліся на некалькі лагераў. Некаторыя падтрымалі аўтарку:

«Калі чалавек камунікабельны і хоча працаваць — неістотна, ці вучыўся ён на гэтую прафесію, ці не».

«У мяне філалагічная адукацыя, а працаваць даводзілася кім толькі не».

«Я з двума вышэйшымі не магу знайсці працу больш за год».

«У Баранавічах працы ў прынцыпе няма».

Людзі скардзяцца на дзіўныя субяседаванні, доўгія анкеты і завышаныя патрабаванні пры заробку каля 1000 рублёў. Многія адзначаюць, што ў Мінску або нават у невялікіх гарадах Мінскай вобласці знайсці працу прасцей і заробкі вышэйшыя.

Іншыя занялі супрацьлеглую пазіцыю:

«Адукацыя — сацыяльны фільтр».

«Работадаўца выбірае паміж вамі і чалавекам з дыпломам — відавочна, каго ён возьме».

«А вы прапануеце і лекарам, і бухгалтарам таксама без адукацыі працаваць?»

Некаторыя наўпрост пісалі, што без адукацыі разлічваць на «нармальную» працу наіўна. Хтосьці раіў ісці прадаўцом або прыбіральшчыцай — там дыплом не абавязковы.

Былі і рэзкія рэплікі: «Самаацэнка — піпец», «Без каментарыяў».